ڈیرہ مراد جمالی ،محکمہ صحت نصیرآباد اور یونیسیف کے اشتراک سے "بگ کیچ اپ" حفاظتی ٹیکہ جات مہم کے حوالے سے ایک اہم شعور و آگاہی سمینار

جمعہ 13 جون 2025 18:31

ڈیرہ مراد جمالی (اُردو پوائنٹ اخبارتازہ ترین - اے پی پی۔ 13 جون2025ء) محکمہ صحت نصیرآباد اور یونیسیف کے اشتراک سے "بگ کیچ اپ" حفاظتی ٹیکہ جات مہم کے حوالے سے ایک اہم شعور و آگاہی سمینار کا انعقاد کیا گیا، جس میں علمائے کرام، بلدیاتی نمائندگان، مختلف سماجی شعبوں سے تعلق رکھنے والے افراد، اور صحت عامہ کے ماہرین نے بڑی تعداد میں شرکت کی ۔سمینار کی صدارت ڈسٹرکٹ ہیلتھ آفیسر ڈاکٹر عبدالمنان لاکٹی نے کی جبکہ مہمانانِ خصوصی میں این اسٹاف کے نمائندہ ڈاکٹر یسین داجلی، ڈویژنل ای پی آئی آفیسر عبدالغنی، کومینٹ کے صدام حسین، ڈی ایس وی ثناء اللہ چکھڑا، مولانا نواب الدین ڈومکی، کونسلر محمد عثمان ادبی ابڑو، قادری محمد اقبال اور دیگر اہم شخصیات علاقہ معتبرین شامل تھے ۔

سمینار کے دوران مقررین نے حفاظتی ٹیکہ جات کی افادیت، اہمیت اور موجودہ حالات میں ان کی ضرورت پر روشنی ڈالی۔

(جاری ہے)

مقررین نے کہا کہ 16 جون 2025 سے ضلع نصیرآباد میں "بگ کیچ اپ" مہم کا باقاعدہ آغاز کیا جا رہا ہے، جس کا مقصد ان بچوں تک حفاظتی ٹیکہ جات پہنچانا ہے جو کسی بھی وجہ سے اس اہم عمل سے محروم رہ گئے ہیں۔ ڈسٹرکٹ ہیلتھ افیسر نصیرآباد ڈاکٹر عبدالمنان لاکٹی نے اپنے خطاب میں کہا کہ حفاظتی ٹیکہ جات نہ صرف بچوں کو مختلف مہلک بیماریوں جیسے خسرہ، پولیو، ٹی بی، کالی کھانسی، تشنج، اور دیگر متعدی امراض سے بچاتے ہیں بلکہ ایک صحت مند معاشرے کی بنیاد رکھتے ہیں۔

این اسٹاف کے ڈاکٹر یسین داجلی اور ڈویژنل ای پی آئی آفیسر عبدالغنی نے بھی مہم کی اہمیت کو اجاگر کرتے ہوئے کہا کہ "بگ کیچ اپ" مہم ایک قومی فریضہ ہے جس کی کامیابی کا دارومدار عوام کی شمولیت پر ہے انہوں نے کہا کہ یونیسیف اور محکمہ صحت کی مشترکہ کوششوں سے ایک منظم اور مؤثر حکمت عملی ترتیب دی گئی ہے تاکہ ہر بچے تک حفاظتی ٹیکہ پہنچایا جا سکے کومینٹ کے صدام حسین نے کہا کہ یہ مہم والدین اور معاشرے کی مجموعی فلاح کے لیے ایک سنہری موقع ہے۔

انہوں نے مذہبی و سماجی رہنماؤں سے بھی اپیل کی کہ وہ اس مہم کی حمایت کریں اور لوگوں میں شعور پیدا کریں۔آخر میں تمام مقررین نے اس مہم کو ایک قومی صحت کا مشن قرار دیا اور والدین پر زور دیا کہ وہ 16 جون سے شروع ہونے والی مہم میں بڑھ چڑھ کر حصہ لیں اور اپنے بچوں کو بیماریوں سے محفوظ بنائیں۔\378