وزیر ہائوسنگ پنجاب کی زیر صدارت اپنی چھت اپنا گھر پروگرام بارے اہم اجلاس

جمعہ 13 جون 2025 21:30

لاہور (اُردو پوائنٹ اخبارتازہ ترین - اے پی پی۔ 13 جون2025ء) وزیر ہاوسنگ اینڈ اربن ڈویلپمنٹ بلال یاسین کی زیر صدارت اپنی چھت اپنا گھر پروگرام بارے اہم اجلاس ہوا،سیکرٹری ہائوسنگ اینڈ اربن ڈویلپمنٹ نور الامین مینگل نے پروگرام بارے تفصیلی بریفنگ دی۔

(جاری ہے)

ڈی جی پھاٹا سکندر ذیشان، صدر بینک آف پنجاب ظفر مسعود، اخوت اور الائیڈ محکموں کے نمائندگان اجلاس میں شریک تھے،پنجاب بھر میں گھروں کی تعمیر کیلئے بلاسود قرضوں کی فراہمی میں تیزی لانے کا فیصلہ کیا گیا، سیکرٹری ہاوسنگ نورالامین مینگل نے بتایا کہ درخواست گزاروں کی تعداد 6 لاکھ 34 ہزار سے تجاوز کر گئی ہے جبکہ 4 ہزار کے قریب گھروں کی تعمیر مکمل ہوچکی ہے، رواںسال میں 1 لاکھ گھروں کا ہدف حاصل کر لیا جائے گا، اجلاس میں اخوت سمیت دیگر ایم ایف آئیز کو دفاتر و عملہ بڑھانے کی ہدایت کی گئی ہے، وزیر ہاوسنگ نے کہا کہ درخواست گزاروں کی آسانی کیلئے گلی، محلہ،تحصیل اور ضلعی سطح پر آگاہی و آسانی فراہم کی جائے گی، 6 لاکھ افراد کی درخواستوں کی سکریننگ کا عمل تیز کیا جائے تاکہ لوگ اپلائی کریں اور فوری گھر بنائیں، بلال یاسین نے واضح کیا کہ گھروں کی تعمیر کیلئے غریب اور مستحق افراد کو ہر ممکن سہولت فراہم کی جائے گی۔