بینظیر انکم سپورٹ پروگرام نے استفادہ کرنے والی خواتین کو شدید گرمی کی لہر سے بچانے کے لیے ادائیگی کا نیا طریقہ اختیار کر لیا

ہفتہ 14 جون 2025 21:30

اسلام آباد (اُردو پوائنٹ اخبارتازہ ترین - اے پی پی۔ 14 جون2025ء) بینظیر انکم سپورٹ پروگرام (بی آئی ایس پی) نے پروگرام سے استفادہ کرنے والی خواتین کو گرمی حالیہ لہر سے محفوظ رکھنے کے لیے کیمپ سائٹ کی بجائے مکمل طور پر ریٹیل نیٹ ورک کے ذریعے ادائیگی کا نیا نظام اختیار کیا ہے، یہ اقدام پیر سے نافذ العمل ہوگا۔ یہ فیصلہ بہاولپور میں ہونے والے ایک اعلی سطحی کوآرڈینیشن اجلاس کے دوران اعلان کیا ، جس کی صدارت بی آئی ایس پی کے ایڈیشنل سیکرٹری ڈاکٹر طاہر نور نے کی۔

اس میٹنگ میں شراکت دار بینکوں کے نمائندوں، زونل افسران اور بی آئی ایس پی کے فیلڈ اسٹاف نے شرکت کی۔ اجلاس میں چوتھے کوارٹر کی ادائیگی کے لیے بینک کے نامزد ریٹیل ایجنٹس کے ذریعے انتظامات کو حتمی شکل دی گئی۔

(جاری ہے)

ڈاکٹر طاہر نور نے کہا کہ نیا ماڈل استفادہ کرنے والوں کو قریبی منظورشدہ ریٹیل آئوٹ لیٹس سے ادائیگی وصول کرنے کا موقع فراہم کرے گا، جس سے سفر اور شدید موسم کی زد میں آنے سے بچا جا سکے گا۔

انہوں نے زور دیا کہ شفافیت اور احتساب بی آئی ایس پی کے مرکزی اصول ہیں۔ انہوں نے ہدایت دی کہ ہر مستفیدہ کو اس کا مکمل حق اور پرنٹ وصولی رسید ضرور ملنی چاہیے اور ادارے کے مالی نظم و ضبط اور مستفیدین کے حقوق کے تحفظ کے عزم کی دوبارہ تصدیق کی۔ پارٹنر بینکس نے اپنی تیاریوں کے بارے میں تفصیلی بریفنگ دی، جس میں ریٹیل ایجنٹس کی تعیناتی، بائیو میٹرک تصدیقی نظام، فنڈز کی مختص کرنے کے طریقہ کار اور رئیل ٹائم مانیٹرنگ کے ٹولز شامل ہیں۔

انہوں نے مستفیدین کو نئے ادائیگی کے طریقہ کار کے بارے میں آگاہ کرنے کی حکمت عملی پر بھی تبادلہ خیال کیا۔ اجلاس کا اختتام تمام اسٹیک ہولڈرز کے اس عہد پر ہوا کہ وہ فنڈز کی بروقت، شفاف اور موثر ترسیل کو یقینی بنائیں گے۔ عہدیداروں نے کہا کہ یہ ریٹیل ماڈل بی آئی ایس پی کی حکمرانی اور خدمت کی فراہمی کو بہتر بنانے کے ساتھ ساتھ عملی اور ماحولیاتی چیلنجز سے نمٹنے کے لیے پیش قدمی کی عکاسی کرتا ہے۔ میٹنگ میں زونل ڈائریکٹر ساتھ، ڈسٹرکٹ ڈائریکٹر بہاولپور اور ڈپٹی ڈائریکٹر (فیلڈ آپریشنز) بھی موجود تھے۔