Live Updates

پشاور بی آر ٹی کرایوں میں اضافہ، یکم جولائی سے اطلاق ہوگا

پیر 16 جون 2025 18:01

پشاور(اُردو پوائنٹ اخبارتازہ ترین - آن لائن۔ 16 جون2025ء)پشاور بی آر ٹی کو دی گئی 4 ارب روپے کی سبسڈی بھی مالی خسارے کو کم نہ کر سکی، جس کے باعث حکام نے بی آر ٹی کرایوں میں اضافے کا فیصلہ کر لیا ہے۔ کرایوں میں یہ اضافہ بورڈ آف گورنرز کی میٹنگ میں منظور کیا گیا، جس کا اطلاق یکم جولائی سے ہوگا۔

(جاری ہے)

سرکاری دستاویزات کے مطابق فی اسٹاپ کرایہ 10 روپے بڑھایا جائے گا جبکہ 5 کلومیٹر کا سفر اب 20 کی بجائے 30 روپے میں طے ہوگا اور40 کلومیٹر کے سفر کا کرایہ 70 روپے کر دیا جائے گا۔

خیبرپختونخوا اربن موبیلیٹی اتھارٹی کے مطابق پشاور بی آر ٹی پر روزانہ تقریباً 6 لاکھ شہری سفر کرتے ہیں، اور کرایہ بڑھنے سے ٹرانس پشاور کو روزانہ 60 لاکھ روپے کی آمدن متوقع ہے۔محکمہ ٹرانسپورٹ کے حکام کا کہنا ہے کہ کرایوں میں اضافہ بڑھتی مہنگائی کے تناظر میں کیا گیا ہے۔حکام کے مطابق منصوبہ مسلسل مالی خسارے کا شکار ہے، جس سے نکلنے کے لیے یہ اضافہ ناگزیر تھا۔