محرم الحرام میں فول پروف سیکورٹی ،امن وامان حکومت پنجاب کی اولین ترجیح ہے‘خواجہ سلمان رفیق

لاہور (اُردو پوائنٹ اخبارتازہ ترین - این این آئی۔ 17 جون2025ء) وزیراعلی پنجاب کی ہدایت پر محرم الحرام سکیورٹی انتظامات کا جائزہ کے حوالے سے کابینہ کمیٹی برائے امن و امان کا گوجرانولہ میں اہم اجلاس منعقد ہوا۔صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے اجلاس کی صدارت کی۔صوبائی وزیر سید عاشق حسین کرمانی، سیکرٹری داخلہ ڈاکٹر احمد جاوید قاضی بھی اس موقع پرموجود تھے۔

گوجرانولہ ڈویژن سے ممبران اسمبلی نے خصوصی طور پر اجلاس میں شرکت کی۔ایڈیشنل آئی جی پنجاب چوہدری سلطان، سپیشل برانچ اور سی ٹی ڈی کے ڈی آئی جیز، ایڈیشنل سیکرٹری داخلہ انٹرنل سکیورٹی، تمام متعلقہ اضلاع سے ڈپٹی کمشنرز اور ڈی پی اوز نے بھی شرکت کی۔کمشنر نوید حیدر شیرازی اور آر پی او طیب حفیظ چیمہ نے انتظامات بارے بریفنگ دی۔

(جاری ہے)

گوجرانوالہ ڈویژن میں محرم الحرام کی 6858 مجالس اور 1588 جلوس کیلئے انتظامات مکمل ہیں۔

گوجرنوالہ ڈویژن میں 258 ذاکرین و مقررین کی ضلع بندی جبکہ 91 کی زباں بندی کے احکامات جاری کئے گئے ہیں۔بریفنگ میں مزیدبتایاگیاکہ گوجرانولہ ڈویژن میں 1263 ڈاکٹرز اور 2645 پیرامیڈیکس ڈیوٹی پر تعینات ہونگے۔گوجرانولہ ڈویژن میں 3158 کومبنگ آپریشنز کیے جن کے نتیجے میں 4132 مقدمات درج ہوئے۔ ڈویژن میں 5525 رضاکاروں کو بھی تربیت دی گئی۔صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے کہاکہ محرم الحرام میں فول پروف سیکورٹی اور امن وامان حکومت پنجاب کی اولین ترجیح ہے۔

محکمہ داخلہ پنجاب کے جاری کردہ قواعد و ضوابط پر من و عن عملدرآمد یقینی بنایا جائے۔امن وامان میں رخنہ ڈالنے والوں سے آہنی ہاتھوں سے نمٹا جائیگا۔ خواجہ سلمان رفیق نے کہاکہ ڈویژنل، ضلعی امن کمیٹیاں مذہبی ہم آہنگی، بھائی چارے اور رواداری کو فروغ دیں۔قیام امن کے حوالے سے امن کمیٹیوں کا کردار لائق تحسین ہے۔صوبائی سیکرٹری داخلہ ڈاکٹر احمد جاوید قاضی نے کہاکہ محکمہ داخلہ پنجاب کے مرکزی کنٹرول روم میں پنجاب بھر کے جلوس اور مجالس کی لائیو مانیٹرنگ ہوگی۔

رضاکاروں اور گارڈز کے یونیفارم، کارڈز اور تعیناتی پر گہری نظر رکھی جائے۔ کمشنر نوید حیدر شیرازی نے کہاکہ پولیس اور انتظامیہ امن وامان کے قیام کو ہر صورت یقینی بنائیں گے۔آر پی او طیب حفیظ چیمہ نے کہاکہ سوشل میڈیا پر شر پسند عناصر کی کڑی نگرانی کی جا رہی ہے۔محکمہ داخلہ کی ہدایت پر تمام اضلاع میں کنٹرول روم قائم کیے جا چکے ہیں۔فوڈ سیفٹی کو مدنظر رکھتے ہوئے لنگر اور سبیل کا اہتمام کیا جائے گا۔