Live Updates

میونسپل کارپوریشن کا آئندہ مالی سال 2025-26 کا تین ارب 81 کروڑ 44 لاکھ 78 ہزار 260 روپے کا بجٹ منظور

منگل 17 جون 2025 20:57

لاڑکانہ (اُردو پوائنٹ اخبارتازہ ترین - اے پی پی۔ 17 جون2025ء) میونسپل کارپوریشن لاڑکانہ کے آئندہ مالی سال 2025-26 کا تین ارب 81 کروڑ 44 لاکھ 78 ہزار 260 روپے کا بجٹ منظور کر لیا گیا ہے۔میونسپل کارپوریشن لاڑکانہ کا بجٹ اجلاس میئر لاڑکانہ ایڈووکیٹ انور علی لہر کی زیر صدارت ہوا، جس میں بجٹ کا آئندہ مالی سال کا بجٹ پیش کیا گیا۔بجٹ میں سب سے زیادہ مالیاتی حصہ ملازمین کی تنخواہوں کے لیے مختص کیا گیا ہے جو کہ ایک ارب 25 کروڑ 62 لاکھ 55 ہزار 796 روپے ہے جبکہ ریٹائر ملازمین کی پنشن اور گریجویٹی کے لیے 36 کروڑ 50 لاکھ روپے مختص کئے گئے ہیں۔

اس کے علاوہ ترقیاتی کاموں کے لیے 43 کروڑ روپے، ڈسپوزلز، جنریٹروں، موبل آئل اور مرمتی اخراجات کے لیے 15 کروڑ روپے رکھنے کا اعلان کیا گیا۔

(جاری ہے)

بجٹ میں سکول طلباءکی سکالرشپ، اقلیتوں، خواتین، ٹرانس جینڈر افراد، معذوروں کی امداد، نلکوں، سولر پلیٹوں اور ویل چیئرز کے لیے 19 کروڑ روپے مختص کئے گئے۔اجلاس میں منتخب اراکین نے شہر کے بنیادی مسائل کی نشاندہی کرتے ہوئے اہم تجاویز پیش کیں، جن میں صفائی کے نظام کی بہتری، عوامی پارکوں کی بحالی، کھیل کے میدانوں کی کمی سمیت دیگر تجاویز شامل تھیں۔

بجٹ میں ترقیاتی کاموں کے لیے 43 کروڑ روپے کی رقم کو شہری بنیادی ڈھانچے کی بہتری کے لیے ایک مثبت قدم قرار دیا گیا۔اجلاس میں ڈپٹی میئر محمد امین شیخ، منتخب نمائندگان ایڈووکیٹ محمد اسلم مغیری، شیر محمد لغاری، نعیم تنیو، منیر احمد سومرو، بابر ابڑو، شاہزیب ابڑو، محمد قاسم بروہی، دانش لغاری، کاشف عمرانی، ذوالفقار بروہی، سعید احمد سومرو، ساجد ڈومکی، غلام نبی بھٹو، رفیق کرمانی، محمد ابراہیم کھوسو، آمنہ جمالی، سمرن خان، شبیران جوکھیو، کمالان برڑو، نصرت پٹھان، زینت بھٹو اور دیگر اراکین نے شرکت کی اور بجٹ پر ہونے والی بحث میں حصہ لیا۔