سعودی شہروں کیلئے "یلو الرٹ" جاری

سعودی عرب کے کئی شہروں میں قیامت خیز گرمی کی لہر متوقع، درجہ حرارت 50 ڈگری سینٹی گریڈ سے تجاوز کر جائے گا

محمد علی بدھ 18 جون 2025 00:27

ریاض (اُردو پوائنٹ اخبارتازہ ترین۔ 17 جون2025ء) سعودی شہروں کیلئے "یلو الرٹ" جاری ، سعودی عرب کے کئی شہروں میں قیامت خیز گرمی کی لہر متوقع، درجہ حرارت 50 ڈگری سینٹی گریڈ سے تجاوز کر جائے گا۔ تفصیلات کے مطابق ماہ جون کا وسط آ جانے پر سعودی عرب میں رہنے والوں کو خبردار کیا گیا ہے کہ وہ قیامت خیز اور غیر معمولی گرمی کی لہر کیلئے تیار ہو جائیں۔

سعودی محکمہ موسمیات نے گرمی کی انتہائی غیر معمولی لہر کے حوالے سے الرٹ جاری کیا ہے۔ سعودی محکمہ موسمیات نے مملکت کے متعدد شہروں میں گرمی کی شدید لہر کے امکان کے باعث یلو الرٹ جاری کیا ہے۔ سعودی محکمہ موسمیات نے مشرقی ریجن کے رہائشیوں کو خصوصی طور پر انتباہ کیا ہے کہ وہ صبح 11 بجے سے شام 5 بجے تک گرمی سے بچنے کی کوشش کریں۔

(جاری ہے)

خبردار کیا گیا ہے کہ سعودی عرب کے مشرقی ریجن کے متعدد شہروں میں درجہ حرارت 50 ڈگری تک پہنچنے کا قوی امکان ہے جبکہ دیگر شہروں میں بھی گرمی 48 اور47 ڈگری کے درمیان رہے گی۔

سعودی محکمہ موسمیات کے مطابق اس سے ملتی جلتی کیفیت ریاض شہر کے علاوہ ریجن کے متعدد شہروں میں ہوگی جہاں گرمی 47 اور48 ڈگری کے درمیان رہے گی، جبکہ مکہ مکرمہ اور جدہ سمیت ساحلی پٹی میں گرمی کے ساتھ گرد و غبار رہے گا۔ گرد وغبار کے باعث حد نگاہ ایک کلو میٹر تک محدود رہنے کا امکان ہے۔ اس کے علاوہ مدینہ منورہ میں بھی تیز ہوا چلے گی جس کی رفتار 49 کلو میٹر فی گھنٹہ ہوگی جس کی وجہ سے حد نگاہ متاثر ہوگی۔ واضح رہے کہ دنیا بھرکے ممالک رواں سال کے دوران غیر معمولی گرمی کی لہر کا سامنا کر رہے ہیں۔ موسمیات کے کئی ماہرین کی جانب سے دعوے کیے جا رہے ہیں کہ دنیا میں شدید گرمی کی تمام ہی ریکارڈ ٹوٹ گئے ہیں۔