اسرائیل مشرق وسطی کا چہرہ بدلنے جا رہا ہے، نیتن یاہو

ایران نے مجھے اور ٹرمپ کو قتل کرنے کی کوشش کی، اسرائیلی وزیر اعظم

منگل 17 جون 2025 14:30

اسرائیل مشرق وسطی کا چہرہ بدلنے جا رہا ہے، نیتن یاہو

․تل ابیب(اُردو پوائنٹ اخبارتازہ ترین - این این آئی۔ 17 جون2025ء)اسرائیل اور ایران کے درمیان حملوں کے جاری تبادلے کے درمیان اسرائیلی وزیر اعظم بنجمن نیتن یاہو نے اعلان کیا کہ تل ابیب مشرق وسطی کا چہرہ بدل رہا ہے۔میڈیارپورٹس کے مطابق تل ابیب سے اپنی تقریر میں نیتن یاہو نے کہا کہ جب اسرائیل ایران پر حملہ کرتا ہے تو وہ اپنے تمام ہتھیاروں سے حملہ کرتا ہے۔

ایران پر حملے غزہ کی پٹی میں حماس کی بنیادی حمایت کو ختم کر دیں گے۔ انہوں نے وضاحت کی کہ ایران جانتا ہے کہ اسرائیل فتح کی طرف گامزن ہے۔انہوں نے اس بات کی بھی تصدیق کی کہ اسرائیل ایران پر حملوں سے اپنے اہداف حاصل کرنے کے لیے جو بھی ضروری ہوگا وہ کرے گا۔ خاص طور پر ایرانی جوہری پروگرام کو ختم کرنے کے لیے اقدام کیا جائے گا۔

(جاری ہے)

انہوں نے انکشاف کیا کہ تل ابیب ایران کو جوہری ہتھیاروں اور بیلسٹک میزائلوں کی تیاری سے روکنے کے لیے کام کر رہا ہے۔

نیتن یاہو نے امریکی صدر ڈونلڈ ٹرمپ کی مدد کو بھی سراہا۔ انہوں نے کہا عالمی رہنماں نے بھی مجھ سے بات چیت میں اسرائیل کے اپنے دفاع کے حق کی تصدیق کی ہے۔ نیتن یاہو نے ایران پر ان کے اور ٹرمپ کو قتل کرنے کی کوشش کرنے کا الزام عائد کیا اور کہا کہ وہ ایران کے خلاف اسرائیل کے تمام منصوبوں پر عوامی سطح پر بات نہیں کریں گے۔انہوں نے یہ بھی کہا کہ ایران ایسے بیلسٹک میزائل تیار کر رہا ہے جو امریکہ تک پہنچنے کی صلاحیت رکھتے ہیں۔ اسرائیل ایک ایک کر کے ایرانی فوجی رہنماں کو مار رہا ہے۔ یہ بیان ایسے وقت میں دیا گیا ہے جب گذشتہ جمعے سے اسرائیل اور ایران کے درمیان حملے جاری ہیں۔ اسرائیل نے 13 جون کی رات کو ایرانی جوہری پروگرام کے خلاف آپریشن رائزنگ لائن کا آغاز کیا تھا۔