پیرس ایئر شو میں جدید ترین بغیر پائلٹ ایئر ٹیکسی متعارف

ٹیکسی مکمل طور پر بجلی سے چلنے والی ہے اور کسی روایتی ایندھن کی محتاج نہیں، رپورٹ

بدھ 18 جون 2025 12:36

پیرس (اُردو پوائنٹ اخبارتازہ ترین - این این آئی۔ 18 جون2025ء)شہریوں کے فضائی سفر میں انقلاب کی نوید سامنے آئی ہے، پیرس ایئر شو میں چین کی بغیر پائلٹ ایئر ٹیکسی نے سب کو حیران کر دیا۔عرب ٹی وی کے مطابق پیرس ایئر شو 2025 میں چین نے جدید ترین بغیر پائلٹ ایئر ٹیکسی متعارف کروا کر عالمی ہوابازی کی صنعت کو حیرت میں ڈال دیا ہے، یہ جدید فضائی سواری 2 مسافروں کو بغیر پائلٹ کے 3 گھنٹے تک پرواز کی سہولت فراہم کرتی ہے۔

ایئر ٹیکسی روایتی ہوائی جہازوں کے برعکس کسی رن وے کے بغیر اڑان بھرنے اور اترنے کی صلاحیت رکھتی ہے، اس خصوصیت کی بدولت یہ شہری علاقوں میں استعمال کے لیے نہایت موزوں ہے جہاں جگہ کی کمی ہے۔یہ ٹیکسی مکمل طور پر بجلی سے چلنے والی ہے اور کسی روایتی ایندھن کی محتاج نہیں، خراب موسم میں بھی پرواز کی صلاحیت، کم شور اور زیرو کاربن اخراج جیسے عوامل نے اسے ماحولیاتی طور پر شہروں کیلیے پرکشش انتخاب بنا دیا ہے۔

(جاری ہے)

اس ایئر ٹیکسی میں انتہائی جدید نیویگیشن سسٹم نصب ہے جو خودکار راستہ طے کرنے، رکاوٹوں سے بچا اور درست لینڈنگ کو یقینی بناتا ہے، 600 کلو گرام وزن اٹھانے کی صلاحیت بھی اسے نمایاں بناتی ہے۔پیرس ایئر شو میں یہ چینی ٹیکسی سب کی توجہ کا مرکز بنی رہی، عالمی صحافی، ماہرین اور سرمایہ کاروں نے اس کو مستقبل کی ٹیکنالوجی کا شاہکار قرار دیا۔ ماہرین کا کہنا تھاکہ یہ 3 گھنٹے کی خودکار پرواز کی صلاحیت رکھنے والی پہلی شہری ڈرون ٹیکسی ہے جو شارٹ ہال فلائٹس کی دنیا کو نئی سمت دے سکتی ہے۔