چاند نظر نہیں آیا

خلیجی اسلامی ملک جس نے سب سے پہلے عید میلاد النبیﷺ کی تاریخ کا اعلان کر دیا

محمد علی ہفتہ 23 اگست 2025 21:07

عمان (اُردو پوائنٹ اخبارتازہ ترین۔ 23 اگست2025ء) چاند نظر نہیں آیا، خلیجی اسلامی ملک جس نے سب سے پہلے عید میلاد النبیﷺ کی تاریخ کا اعلان کر دیا۔ تفصیلات کے مطابق سلطنت عمان دنیا میں سب سے پہلے رواں ہجری سال کی عید میلاد النبیﷺ کی تاریخ کا اعلان کرنے والا ملک بن گیا۔ خلیج ٹائمز کے مطابق عمان کی رویت ہلال کمیٹی کے مطابق سلطنت میں ہفتے کی شام کو چاند نظر نہیں آیا، لہذا یکم ربیع الاول 25 اگست بروز پیر کو ہو گی، جبکہ عید میلاد النبیﷺ 5 ستمبر بروز جمعہ کو منائی جائے گی۔

واضح رے کہ ماہ ربیع الاول کے چاند کی رویت سے متعلق کی گئی پیشن گوئی کے مطابق ہفتے کی صبح کو ماہ ربیع الاول کے چاند کی پیدائش ہو گئی ۔ محکمہ موسمیات نے 24اگست کو ربیع الاول کا چاند نظر آنے کی پیشگوئی کردی۔

(جاری ہے)

محکمہ موسمیات کے مطابق ربیع الاول 1447ہجری کا آغاز 25اگست بروز پیر متوقع ہے۔ کراچی میں چاند دیکھنے کے اچھے امکانات ہیں۔ چاند کی پیدائش 23اگست صبح 11بج کر 6منٹ پر ہوگئی۔

24اگست کی شام مطلع جزوی ابر آلود یا صاف رہنے کا امکان ہے۔محکمہ موسمیات کا کہنا ہے کہ ملک کے بیشتر علاقوں میں بھی مطلع صاف یا جزوی ابر آلود رہے گا۔ 24اگست کو چاند کی عمر 32گھنٹے 17منٹ ہوگی۔ غروب آفتاب کے بعد چاند 44منٹ تک افق پر موجود رہے گا۔ چاند دیکھنے کے لئے اس کی عمر 19گھنٹے سے زائد ہونا ضروری ہوتا ہے۔ مزید بتایا گیا ہے کہ 12ربیع الاول جمعہ کے روز ہونے کی صورت میں ملازمین تین چھٹیاں انجوائے کریں گے۔

اگر رویت ہلال کمیٹی کی جانب سے ربیع الاول کا چاند24اگست کو نظر آنے کا اعلان کیا جاتا ہے تو اس ترتیب سے 12ربیع الاول عید میلاد النبیﷺ 5 ستمبر بروز جمعہ کو ہو گی اوراس روز ملک میں عام تعطیل ہوتی ہے ،6ستمبر کو ہفتہ اور7ستمبر کو اتوار کی تعطیلات کے ساتھ ملازمین تین چھٹیاں منائیں گے ۔دوسرے شہروں سے تعلق رکھنے والے سرکاری ملازمین نے جمعرات کے روز ڈیوٹی مکمل کر کے آبائی علاقوں کو روانگی کی منصوبہ بندی شروع کر دی ہے ۔