آکسفورڈ، مسجد کے دروازے پر سور کا گوشت اور اسرائیلی پرچم پھینک دیا گیا

ہم کمیونٹی رہنماوں کے ساتھ قریبی رابطے میں ہیں اور تحقیقات جاری ہیں،چیف سپرنٹنڈنٹ بین کلارک

ہفتہ 23 اگست 2025 17:03

آکسفورڈ، مسجد کے دروازے پر سور کا گوشت اور اسرائیلی پرچم پھینک دیا ..

لندن(اُردو پوائنٹ اخبارتازہ ترین - این این آئی۔ 23 اگست2025ء)مرکزی آکسفورڈ مسجد کے داخلی دروازے پر سور کا گوشت اور ایک اسرائیلی پرچم چھوڑا گیا۔برطانوی میڈیا کے مطابق تھیمز ویلی پولیس کے چیف سپرنٹنڈنٹ بین کلارک نے کہا کہ یہ ایک اشتعال انگیز عمل تھا جس کا مقصد مسجد آنے والوں کو ناراض اور مشتعل کرنا تھا۔ ایسا رویہ ہماری کمیونٹی میں کسی صورت قابلِ قبول نہیں ہے۔

تھیمزویلی پولیس کے چیف سپرنٹنڈنٹ نے کہا کہ ہم اپنی پوری کوشش کریں گے کہ اس میں ملوث افراد کو انصاف کے کٹہرے میں لایا جائے۔

(جاری ہے)

انہوں نے مزید کہا کہ اس واقعے کی فعال تحقیقات جاری ہیں اور مختلف پہلووں پر تفتیشی ٹیم کام کر رہی ہے۔چیف سپرنٹنڈنٹ بین کلارک کا کہنا تھا کہ ہم سمجھتے ہیں کہ یہ واقعہ کمیونٹی کے لیے پریشان کن ہے، اسی لیے ہم کمیونٹی رہنماوں کے ساتھ قریبی رابطے میں ہیں اور تحقیقات جاری ہیں۔ مسجد کھلی ہوئی ہے اور متاثرین کو پولیس کی جانب سے مکمل تعاون فراہم کیا جا رہا ہے۔علاوہ ازیں پولیس نے عوام سے اپیل کی ہے کہ اگر کسی کے پاس اس واقعے سے متعلق معلومات ہوں تو وہ 101 پر کال کریں یا آن لائن رپورٹ کریں اور ریفرنس نمبر 43250423138 بتائیں۔