میکسیکو میں دو دن میں دوسری خاتون میئر قتل

مغربی ریاست میچواکان میںخاتون میئر کو فائرنگ کر کے قتل کیاگیا

بدھ 18 جون 2025 12:54

میکسیکوسٹی (اُردو پوائنٹ اخبارتازہ ترین - این این آئی۔ 18 جون2025ء)میکسیکو میں منظم جرائم کی لہر شدت اختیار کر گئی، مغربی ریاست میچواکان میں ایک اور خاتون میئر کو فائرنگ کر کے قتل کر دیا گیا۔میڈیارپورٹس کے مطابق مقتولہ مارتھا لورا مینڈوزا شہر تیپالکاٹے پیک کی میئر تھیں اور صدر کلاڈیا شین بام کی بائیں بازو کی حکمران جماعت مورینا پارٹی کی رکن تھیں۔

میچواکان کے پراسیکیوٹر کے دفتر نے سوشل میڈیا پلیٹ فارم ایکس پر تصدیق کی کہ مینڈوزا کو ان کے شوہر کے ہمراہ قتل کیا گیا، تاہم حملے کی تفصیلات جاری نہیں کی گئیں، صرف اتنا بتایا گیا کہ واقعہ فیما سائیڈ (عورت پر جان لیوا حملہ)کے زمرے میں آتا ہے۔مخالف جماعت پی آر آئی کے رہنما اور تیپالکاٹیپیک کے سابق میئر گییئرمو ویلنشیا نے دعوی کیا کہ انہیں موصولہ اطلاعات کے مطابق مینڈوزا اور ان کے شوہر کو اس وقت نشانہ بنایا گیا جب وہ اپنے گھر سے باہر نکل رہے تھے۔

(جاری ہے)

ریاست میچواکان ملک کی سب سے بڑی ایووکاڈو پیدا کرنے والی ریاست ہے، اب جرائم اور گینگ وار کا شکار ہے، یہاں کی بندرگاہ لازارو کارڈیناس اور متعدد سیاحتی مقامات اکثر جرائم پیشہ گروہوں کے نشانے پر رہتے ہیں۔مینڈوزا کے قتل سے صرف دو دن پہلے ریاست اوآخاکا کے شہر سان ماٹیو پیناس کی میئر لیلیا گارشیا کو ان کے دفتر میں گولی مار کر قتل کر دیا تھا، جس میں ان کے ایک ساتھی کی بھی جان گئی تھی۔میکسیکو میں حالیہ برسوں میں درجنوں مقامی عہدیدار منظم جرائم پیشہ گروہوں کا نشانہ بن چکے ہیں، خاص طور پر وہ علاقے جہاں طاقتور منشیات فروش سرگرم ہیں۔ گزشتہ ماہ دارالحکومت میکسیکو سٹی میں میئر کلارا بروگاڈا اور دو معاونین کو ٹریفک میں سفر کے دوران گولیاں مار کر ہلاک کر دیا گیا۔