بیرسٹرسیف کا وفاق سے ضم شدہ اضلاع کے 267ارب واجب الادا منتقل کرنے کا مطالبہ

فنڈز روکنا دہشت گردی کو فروغ دینے کے مترادف ہے، وفاق کی غیر سنجیدگی نازک قومی معاملے کو خطرے میں ڈال رہی ہے، مشیر اطلاعات خیبرپختونخوا

بدھ 18 جون 2025 20:12

بیرسٹرسیف کا وفاق سے ضم شدہ اضلاع کے 267ارب واجب الادا منتقل کرنے کا ..

پشاور (اُردو پوائنٹ اخبارتازہ ترین - این این آئی۔ 18 جون2025ء)مشیر اطلاعات خیبرپختونخوا بیرسٹر سیف نے وفاق سے ضم شدہ اضلاع کے 267ارب واجب الادافنڈز منتقل کرنے کا مطالبہ کرتے ہوئے کہا ہے کہ فنڈز روکنا دہشت گردی کو فروغ دینے کے مترادف ہے، وفاق کی غیر سنجیدگی نازک قومی معاملے کو خطرے میں ڈال رہی ہے۔ جاری بیان میں مشیر اطلاعات بیرسٹر سیف نے کہا ہے کہ رواں مالی سال 2024-25ء کے دوران وفاق نے ضم اضلاع کیلئے 350ارب روپے مختص کئے تھے تاہم گزشتہ 10 ماہ میں صرف 83ارب روپے فراہم کیے گئے ہیں جبکہ 267ارب روپے تاحال واجب الادا ہیں۔

انہوں نے کہا ہے کہ ضم شدہ اضلاع کی ترقی اور انہیں قومی دھارے میں شامل کرنا ہم سب کی مشترکہ ذمہ داری ہے لیکن وفاق کی غیر سنجیدگی اس نازک قومی معاملے کو خطرے میں ڈال رہی ہے۔

(جاری ہے)

انہوں نے کہا کہ انضمام کا اصل مقصد قبائلی علاقوں کو قومی ترقی کا حصہ بنانا تھا مگر وفاق کی جانب سے فنڈز کی عدم فراہمی سے یہ مقصد شدید خطرے میں پڑ گیا ہے۔انہوں نے خبردار کیا کہ ضم شدہ اضلاع کے فنڈز روکنا درحقیقت دہشت گردی کو فروغ دینے کے مترادف ہے، جب تک ان علاقوں میں ترقیاتی منصوبے شروع نہیں ہوتے تب تک دہشت گردی کے خاتمے کا خواب شرمندہ تعبیر نہیں ہو سکتا۔

بیرسٹر سیف نے زور دیا کہ وفاق این ایف سی ایوارڈ کے تحت مختص تمام فنڈز فوری طور پر خیبرپختونخوا حکومت کو منتقل کرے تاکہ قبائلی عوام کو بنیادی سہولیات، روزگار، تعلیم اور صحت جیسی سہولیات فراہم کی جا سکیں۔