ڈپٹی کمشنر بٹگرام کی زیر صدارت کوزہ بانڈہ ٹول پلازہ اور ٹیکس وصولی بارے اجلاس

جمعرات 19 جون 2025 14:09

ایبٹ آباد (اُردو پوائنٹ اخبارتازہ ترین - اے پی پی۔ 19 جون2025ء) ڈپٹی کمشنر بٹگرام آصف علی خان کی زیر صدارت کوزہ بانڈہ ٹول پلازہ اور ٹیکس وصولی کے حوالے سے اجلاس منعقد ہوا۔ اجلاس میں ڈسٹرکٹ پولیس آفیسر محمد ایاز، این ایچ اے حکام، اسسٹنٹ کمشنر، ڈی ایس پی سرکل، انجمن تاجران بٹگرام کے نمائندوں اور ٹرانسپورٹ نمائندوں نے شرکت کی۔

(جاری ہے)

اس موقع پر انجمن تاجران بٹگرام اور ٹرانسپورٹ نمائندوں نے نیشنل ہائی وے اتھارٹی کے حکام سے مطالبہ کیا کہ کوزہ بانڈہ ٹول پلازہ پر مقامی لوگوں کے لئے ٹول ٹیکس فری کیا جائے یا پھر کوئی اور ٹول ٹیکس ادائیگی کا طریقہ کار اپنایا جائے ۔

انہوں نے موقف اختیار کیا کہ کوزہ بانڈہ ٹول پلازہ کے دونوں اطراف پر مقامی آبادیاں ہیں بعض اوقات دن میں کئی مرتبہ گزرنا پڑتا ہے اور ہر بار ستر ستر روپے ادا کرنا ظلم ہے۔ ڈپٹی کمشنر بٹگرام نے این ایچ اے حکام کو اس مسئلے کا مستقل حل تلاش کرنے کے حوالے سے ضروری ہدایات جاری کیں۔ این ایچ اے حکام نے ڈپٹی کمشنر بٹگرام کو یقین دہانی کرائی کہ اس مسئلے کو مستقل بنیادوں پر حل کرنے کے لئے افسران بالا سے ملاقات کی جائے گی اور عوامی مفاد میں بہترین حل تلاش کیا جائے گا۔