لاہور چیمبر کے زیر اہتمام ’’ہم سب پاکستان‘‘ بین المذاہب ہم آہنگی کانفرنس کا انعقاد

لاہور (اُردو پوائنٹ اخبارتازہ ترین - اے پی پی۔ 19 جون2025ء) لاہور چیمبر آف کامرس اینڈ انڈسٹری نے’’ہم سب پاکستان‘‘ کے عنوان سےقومی اتحادکو فروغ دینے کے حوالے سے ایک اہم بین المذاہب ہم آہنگی کانفرنس منعقد ہوئی۔ کانفرنس سے صوبائی وزیر برائے اقلیتی امور رمیش سنگھ اروڑہ، صدر لاہور چیمبر میاں ابوذر شاد، سینئر نائب صدر انجینئر خالد عثمان، سابق صدر محمد علی میاں، سابق نائب صدر فہیم الرحمن سہگل، سیاسی رہنماوں لیاقت بلوچ، خرم نواز گنڈاپور، لاہور چیمبر کی سٹینڈنگ کمیٹی برائے بین المذاہب ہم آہنگی کے چیئرمین سردار بشن سنگھ بیدی اور مختلف مذاہب کے علمائے کرام نے خطاب کیا۔

صوبائی وزیر رمیش سنگھ اروڑہ نے اپنے خطاب میں کہا کہ اس طرح کی بین المذاہب تقریبات کا انعقاد وقت کی اہم ضرورت ہے۔

(جاری ہے)

انہوں نے کہا کہ پاکستان تمام شہریوں کا ملک ہے،خواہ ان کا تعلق کسی بھی مذہب یا قومیت سے ہو۔ لاہور چیمبر کی انٹرفیتھ ڈائیلاگ اور ہم آہنگی کے فروغ کے لیے کوششیں قابل تحسین ہیں۔ اب وقت آگیا ہے کہ معاشرے کے تمام طبقات مل کر پرامن فضا قائم کرنے کے لیے فعال کردار ادا کریں۔

صدر لاہور چیمبر میاں ابوذر شاد نے کہا کہ لاہور چیمبر بین المذاہب ہم آہنگی کے فروغ کے لیے پرعزم ہے اور مختلف کمیونٹیز کو امن اور حب الوطنی کے پرچم تلے اکٹھا کرنے کی جدوجہد جاری رکھے گا۔ انہوں نے کہا کہ ہم پاکستان کے استحکام کے لیے مسلح افواج کی قربانیوں کو خراج تحسین پیش کرتے اور اقلیتوں کے قومی ترقی میں کردار کو بھی قدر کی نگاہ سے دیکھتے ہیں۔

ان کا کردار جمہوریت، ترقی اور سماجی اقدار کے فروغ میں بے حد اہم ہے۔انہوں نے کہا کہ ایک مستحکم معیشت ایک مستحکم اور ہم آہنگ معاشرے کے بغیر ممکن نہیں اور دونوں ہی قومی استحکام کے لیے لازم و ملزوم ہیں۔سینئر نائب صدر انجینئر خالد عثمان نے اتحاد کی اہمیت پر زور دیتے ہوئے کہا کہ ہم چاہے مختلف مذاہب سے تعلق رکھتے ہوں، لیکن ہماری شناخت ایک ہے پاکستان۔

ہمارا مقصد اجتماعی ترقی، قومی طاقت اور سب کے لیے امن ہونا چاہیے۔ سابق صدر لاہور چیمبر محمد علی میاں نے معاشرے کے تمام طبقات پر زور دیا کہ وہ مل کر ایک مضبوط اور پرامن پاکستان کی تعمیر میں کردار ادا کریں۔ سابق نائب صدر فہیم الرحمن سہگل نے کہا کہ مذہبی ہم آہنگی قومی ترقی کے لیے ناگزیر ہے اور ہمیں ایک ایسے ملک کی تشکیل کے لیے مل جل کر کام کرنا ہوگا جہاں ہماری آئندہ نسلیں برداشت، رواداری اور اتحاد کی فضا میں پروان چڑھیں۔

سٹینڈنگ کمیٹی برائے بین المذاہب ہم آہنگی کے چیئرمین سردار بشن سنگھ بیدی نے لاہور چیمبر کی قیادت کو خراجِ تحسین پیش کیا کہ وہ مختلف مذاہب سے تعلق رکھنے والے افراد کو قریب لانے کے لیے عملی اقدامات کر رہے ہیں۔ انہوں نے زور دیا کہ معاشی ترقی، سماجی امن اور مذہبی بقائے باہمی ایک دوسرے سے جو ڑے ہوئے عناصر ہیں اور ان سب کو ساتھ لے کر چلنا وقت کی اہم ترین ضرورت ہے۔