ڈپٹی کمشنر سرگودھا کی جانب سے دریاوں، نہروں و دیگر آبی مقامات پر نہانے پر ضابطہ فوجداری کے تحت دفعہ 144 کا نافذ

ہفتہ 21 جون 2025 14:32

سرگودھا (اُردو پوائنٹ اخبارتازہ ترین - اے پی پی۔ 21 جون2025ء) ڈپٹی کمشنر سرگودھا کیپٹن (ر) محمد وسیم نے دریاوں، نہروں و دیگر آبی مقامات پر نہانے پر عائد پابندی کی خلاف ورزی پر سخت نوٹس لیتے ہوئے تمام متعلقہ اداروں کو ہدایت کی ہے کہ ایسے افراد کے خلاف دفعہ 144 ضابطہ فوجداری کے تحت فوری کارروائی عمل میں لائی جائے۔ ڈپٹی کمشنر نے کہا کہ گرم موسم کے پیش نظر عوام الناس خصوصاً کم سن بچوں کا نہروں اور دریاوں میں نہانا خطرناک اور جان لیوا ثابت ہو رہا ہے۔

حالیہ دنوں میں ڈوبنے کے متعدد افسوسناک واقعات پیش آئے ہیں جن کی روک تھام ضلعی انتظامیہ کی اولین ترجیح ہے۔انہوں نے واضح طور پر ہدایت کی کہ پولیس ایسے بچوں کے والدین کے خلاف بھی موثر قانونی کارروائی کرے جو اپنے بچوں کو نہروں یا دریاﺅں پر نہانے کی اجازت دیتے ہیں یا ان کی نگرانی نہیں کرتے۔

(جاری ہے)

انہوں نے کہا کہ والدین کی غفلت کسی صورت برداشت نہیں کی جائے گی۔

ڈپٹی کمشنر نے تمام اسسٹنٹ کمشنرز، متعلقہ تھانوں کے ایس ایچ اوز اور ریسکیو اداروں کو ہدایت دی ہے کہ نہروں اور دریاﺅں کے کنارے موثر نگرانی کو یقینی بنائیں اور پابندی کی خلاف ورزی کرنے والوں کے خلاف بلا امتیاز کارروائی کی جائے۔عوام الناس سے اپیل کی جاتی ہے کہ وہ اپنی اور اپنے بچوں کی قیمتی جانوں کی حفاظت کے پیش نظر دریا، نہروں یا دیگر خطرناک مقامات پر نہانے سے گریز کریں اور ضلعی انتظامیہ سے تعاون کریں۔