شمالی نصف کرہ میں 21 جون رواں سال 2025 کا طویل ترین دن ، مختصر ترین رات،

ہفتہ 21 جون 2025 17:15

اسلام آباد (اُردو پوائنٹ اخبارتازہ ترین - اے پی پی۔ 21 جون2025ء) 21 جون کو رواں سال کا طویل ترین دن اور مختصر ترین رات ہے جو شمالی نصف کرہ میں موسم گرما کے عروج کی علامت ہے۔معروف ماہر فلکیات پروفیسر ڈاکٹر محمد جاوید اقبال نے کہا ہے کہ 21 جون کو شمالی نصف کرہ کا سورج کی جانب سب سے زیادہ جھکائو ہوتا ہے جس کے نتیجے میں دن کا طویل ترین دورانیہ 13 گھنٹے 41 منٹ جب کہ رات صرف 10 گھنٹے اور 19 منٹ تک محدود ہوتی ہے۔

انہوں نے مزید کہا کہ یہ موسمی تبدیلی زمین کے محوری جھکاؤ اور اس کے مدار کا نتیجہ ہے جو پورے سال کے دنوں اور راتوں کی دورانیہ میں تغیرات پیدا کرتی ہے۔ ڈاکٹر محمد جاوید اقبال نے وضاحت کی کہ یکم جولائی کے بعد دن کا دورانیہ آہستہ آہستہ سکڑنا شروع ہو جائے گا اور بالآخر 22 ستمبر کو دن اور رات کے دورانیہ مین توازن قائم ہو جائے گا۔

(جاری ہے)

انہوں نے مزید کہا کہ لمبے دن اور چھوٹی راتیں شمالی نصف کرہ میں گرمیوں کے موسم کیلئے مخصوص ہیں اور 21 جون کو دن سب سے طویل ہوتا ہے۔

انہوں نے یہ بھی واضح کیا کہ سورج کے گرد زمین کا محوری جھکاؤ اور مدار یہ موسمی تبدیلیاں پیدا کرتے ہیں۔ انہوں نے کہا کہ گرمیوں میں شمالی نصف کرہ سورج کی طرف جھکتا ہے جس کے نتیجے میں دن کی روشنی میں اضافہ ہوتا ہے۔ انہوں نے کہا اس کے برعکس موسم سرما دن چھوٹے ہوتے ہیں۔