سیلاب متاثرین سے اظہارِ ہمدردی، یو اے ای میں یومِ آزادی کی تقریبات ملتوی

یہ المیہ ناصرف متاثرہ خاندانوں بلکہ پوری قوم کے لیے ایک کڑا امتحان ہے؛ پاکستانی سفیر فیصل نیاز ترمذی کا بیان

ساجد علی اتوار 17 اگست 2025 20:35

سیلاب متاثرین سے اظہارِ ہمدردی، یو اے ای میں یومِ آزادی کی تقریبات ..

ابو ظہبی ( اُردو پوائنٹ اخبارتازہ ترین۔ 17 اگست 2025ء ) پاکستان میں سیلاب متاثرین سے اظہارِ ہمدردی کرتے ہوئے یو اے ای میں یومِ آزادی کی تقریبات ملتوی کردی گئیں۔ تفصیلات کے مطابق متحدہ عرب امارات میں پاکستانی سفیر فیصل نیاز ترمذی نے حالیہ سیلاب کے باعث پاکستان کے مختلف علاقوں بشمول خیبر پختونخواہ کے اضلاع بونیر، باجوڑ، شانگلہ، مانسہرہ و دیگر علاقوں اور کشمیر و گلگت بلتستان میں قیمتی جانوں اور گھروں کے ضیاع پر گہرے دکھ اور افسوس کا اظہار کیا ہے۔

(جاری ہے)

اس حوالے سے سفارت خانہ کی جانب سے جاری بیان میں انہوں نے کہا کہ یہ المیہ ناصرف متاثرہ خاندانوں بلکہ پوری قوم کے لیے ایک کڑا امتحان ہے، فیصل نیاز ترمذی نے متحدہ عرب امارت میں بسنے والے پاکستانی کمیونٹی سے اپیل کی ہے کہ دکھ کی اس گھڑی میں ہم وطنوں کے ساتھ کھڑے ہوں، غم بانٹیں اور ہر ممکن تعاون کریں۔ یو اے ای میں پاکستانی سفیر کا مزید کہنا ہے کہ اس افسوسناک سانحہ کے پیشِ نظر متاثرہ خاندانوں کے ساتھ یکجہتی کا اظہار کرتے ہوئے متحدہ عرب امارت میں منعقدہ یومِ آزادی کی تقریبات ملتوی کردی گئی ہیں، اللہ تعالیٰ مرحومین کی مغفرت فرمائے اور لواحقین کو صبرِ جمیل عطا کرے۔