وزیرداخلہ نے سعودی وفد سے فیلڈ مارشل کے مکالمہ کی تفصیل بتا دی

لاہور ( اُردو پوائنٹ اخبارتازہ ترین۔ 17 اگست 2025ء ) وزیرداخلہ محسن نقوی نے بھارت کے ساتھ جھڑپ کے دوران سعودی وفد سے فیلڈ مارشل عاصم منیر کے مکالمہ کی تفصیل بتا دی۔ لاہور میں سیمینار سے خطاب کرتے ہوئے انہوں نے بتایا کہ پاکستان پر دباؤ آیا کہ جہاز گرانے کے بعد بھارت کے خلاف مزید کوئی کارروائی نہ کی جائے، جنگ کے دنوں میں ایک سعودی وفد بھی پاکستان آیا تو فیلڈ مارشل نے انہیں کہا انڈیا ایک چمکتی ہوئی مرسڈیز کی طرح ہے اور ہم پتھروں سے بھرے ڈمپر ٹرک کی طرح ہیں، اندازہ کرلیں جب دونوں ٹکرائیں گے تو کیا ہوگا؟ اس کے بعد سعودی چپ ہوگئے۔

محسن نقوی کہتے ہیں کہ بھارت نے ہماری ایک بیس پر 7 میزائل فائر کیے لیکن ان میں سے ایک بھی بیس کے اندر نہیں گرا، پاکستان نے بھارت کے سب سے بڑے آئل سٹوریج پر میزائل فائر کیے، بھارت کی بہت سی چیزیں ٹارگٹ پر تھیں اور ہم مزید حملے کرسکتے تھے لیکن ہماری کوشش تھی کہ بھارت کو ڈرامہ کرنے کا موقع نہ دیں، بھارتی طیارے گرانے کے بعد ہی یہ فیصلہ کیا تھا کہ ثبوت آنے تک اعلان نہیں کریں گے، بھارت کے طیارے گرنے کے ثبوت منٹوں میں ہمارے پاس آئے جس کا آج اعلان کر رہا ہوں۔

(جاری ہے)

ان کا کہنا ہے کہ اس جنگ میں ہمیں اللہ کی غیبی مدد حاصل تھی، پاک فوج، ایئر فورس اور بحریہ نے ایک حکمت علمی کے تحت جنگ لڑی، فیلڈ مارشل جنرل عاصم منیر اور وزیراعظم شہباز شریف کو کریڈٹ جاتا ہے کہ انہوں نے اس پریشر کو قبول کیا اور بھارت کو بھرپور جواب دیا، چند لوگ اس موقع پر بھی انٹیلی جنس ایجنسیز کو برا بھلا کہنے سے باز نہیں آتے، انٹیلی جنس ایجنسیز نے پاک بھارت جنگ میں پس پردہ بہترین کام کیا، بھارت کا ایک ایک فیصلہ ہماری انٹیلی جنس ایجنسیز کے پاس ہوتا تھا۔

وزیر داخلہ نے کہا کہ اس جنگ میں پاکستان میں مثالی اتحاد دیکھا گیا اور تمام سیاسی جماعتیں اختلافات بھلا کر اکٹھی تھیں، دوسری جانب بھارت کا آرمی چیف اور ایئر چیف الگ الگ مودی سے مل رہے تھے، پہلگام فالس فلیگ آپریشن ڈرامے اور پاک بھارت جنگ کے پیچھے اجیت دوول اور میت شاہ کا کردار تھا یہ دونوں مودی کے ساتھ بھارت کو بھی لے ڈوبیں گے، بھارت اس وقت پاکستان میں کھلے عام دہشتگردی میں ملوث ہے اور تمام دہشتگرد سرگرمیوں کا سب سے بڑا مفاد بھارت نے حاصل کیا، بھارت بلوچستان میں دہشت گردی کے لیے کے لیے کالعدم بی ایل اے کی پشت پناہی کر رہا ہے، بھارت کھلے عام بلوچستان میں دہشت گردی کروا رہا ہے، ہم بھی کشمیر کا پیچھا اس وقت تک کریں گے جب تک کشمیریوں کوان کا حق نہیں ملتا۔