Live Updates

امریکا کی چین سے آبنائے ہرمز بند کرنے کے ممکنہ ایرانی فیصلے میں کردار اداکرنے کی اپیل

ایران نے سمندری گزرگاہ کو بند کیا تویہ ایک اور سنگین غلطی ہوگی ‘ہمارے پاس اس سے نمٹنے کے کئی آپشن موجود ہیں.مارکوروبیو

میاں محمد ندیم پیر 23 جون 2025 14:53

امریکا کی چین سے آبنائے ہرمز بند کرنے کے ممکنہ ایرانی فیصلے میں کردار ..

واشنگٹن(اردوپوائنٹ اخبارتازہ ترین-انٹرنیشنل پریس ایجنسی۔23 جون ۔2025 )امریکہ کے وزیر خارجہ مارکو روبیو نے چین پر زور دیا ہے کہ وہ تہران کو آبنائے ہرمز بند کرنے سے باز رکھنے میں کردار ادا کرے کیونکہ یہ اقدام امریکی فضائی حملوں کے ردعمل میں ایران کی جانب سے متوقع ردعمل کے طور پر سامنے آ سکتا ہے.

(جاری ہے)

امریکی نشریاتی ادارے ”فاکس نیوز“سے گفتگو کرتے ہوئے مارکوروبیو نے کہاکہ میں بیجنگ میں چینی حکومت سے اپیل کرتا ہوں کہ وہ اس معاملے پر ایران سے بات کرے کیونکہ چین اپنی تیل کی فراہمی کے لیے آبنائے ہرمز پر بری طرح انحصار کرتا ہے تجزیہ کاروں کا کہنا ہے کہ ایران واشنگٹن کی جانب سے اپنے جوہری مراکز پر حملے کے جواب میں آبنائے ہرمز کو بند کرنے کا راستہ اختیار کر سکتا ہے یہ آبی گزرگاہ دنیا کے تیل کی ترسیل کا ایک اہم ذریعہ ہے جہاں سے دنیا بھر کے کل تیل کا پانچواں حصہ گزرتا ہے.

امریکی وزیرخارجہ نے کہاکہ اگر ایران نے ایسا کیا تو یہ ایک اور سنگین غلطی ہوگی یہ ان کے لیے معاشی خودکشی کے مترادف ہوگا ہمارے پاس اس سے نمٹنے کے کئی آپشن موجود ہیں انہوں نے متنبہ کیا کہ دیگر ممالک کو بھی اس معاملے پر سنجیدگی سے غور کرنا چاہیے کیونکہ اس کے نتائج ان کی معیشتوں پر امریکہ سے کہیں زیادہ منفی پڑیں گے میں سمجھتا ہوں کہ یہ ایک بہت بڑا اشتعال انگیز اقدام ہوگا جس کا ردعمل صرف ہماری جانب سے نہیں بلکہ دیگر ممالک کی طرف سے بھی آ سکتا ہے.

ادھرگولڈمین سیکس بینک نے خبردار کیا ہے کہ آبنائے ہرمز میں کسی بھی ممکنہ خلل کے باعث عالمی توانائی کی فراہمی کو شدید خطرات لاحق ہو سکتے ہیں جس کے نتیجے میں تیل اور قدرتی گیس کی قیمتیں غیر معمولی حد تک بڑھ سکتی ہیں بینک نے اندازہ ظاہر کیا کہ اگر آبنائے ہرمز سے تیل کی ترسیل ایک ماہ کے لیے نصف رہ جائے اور اس کے بعد گیارہ ماہ تک 10 فیصد کم سطح پر برقرار رہے تو برینٹ کروڈ کی قیمت عارضی طور پر 110 ڈالر فی بیرل تک جا سکتی ہے.

پیر کو خام تیل کی قیمتیں جنوری کے بعد کی بلند ترین سطح پر پہنچ گئیں جب واشنگٹن نے ہفتے کے اختتام پر ایران کی جوہری تنصیبات پر حملے میں اسرائیل کا ساتھ دیا گولڈمین نے اپنی رپورٹ میں اس جانب توجہ دلائی کہ اگرچہ پیش گوئی کی منڈیوں میں لیکویڈٹی محدود ہے لیکن پولی مارکیٹ کے اعداد و شمار کے مطابق اب ان میں 2025 میں ایران کی جانب سے آبنائے ہرمز بند کیے جانے کے امکان کو 52 فیصد تک ظاہر کیا جارہا ہے بینک نے کہا کہ اگر ایرانی تیل کی سپلائی میں روزانہ 17.5 لاکھ بیرل کی کمی واقع ہو تو برینٹ کروڈ کی قیمت عروج پر پہنچ کر تقریباً 90 ڈالر فی بیرل ہوسکتی ہے.