روہڑی میں کھیلوں کے بڑے ایونٹ کا افتتاح کر دیا گیا

پیر 23 جون 2025 16:17

سکھر (اُردو پوائنٹ اخبارتازہ ترین - اے پی پی۔ 23 جون2025ء) سپورٹس اینڈ یوتھ افیئرز ڈپارٹمنٹ حکومت سندھ کے زیر اہتمام روہڑی میں کھیلوں کے رنگا رنگ ایونٹ کا افتتاح کر دیا گیا ،افتتاحی تقریب کے مہمانانِ خصوصی میں انجینئر خالد بلوچ (سپورٹس کمپلیکس سکھر)، اسفند یار منگی (ڈپٹی ڈائریکٹر سپیشل چلڈرن)، محمد اخلاق میمن (ڈسٹرکٹ سپورٹس آفیسر سکھر) اور مشتاق بھٹو (فرسٹ کلاس کرکٹر سکھر) شامل تھے۔

کھیلوں کے رنگا رنگ ایونٹ میں مختلف مقابلوں کا انعقاد کیا گیا۔ افتتاحی تقریب میں 180 کھلاڑیوں میں شرٹس تقسیم کی گئیں ۔ کرکٹ، فٹبال، پتھو گول گرم اور دوڑ کے مقابلے پہلے دن کا حصہ رہے ۔ جاری کئے گئے اعلامیہ کے مطابق ایونٹ میں 4 کرکٹ ٹیمیں، 6 فٹبال ٹیمیں اور 4 پتھو گول گرم ٹیمیں حصہ لے رہی ہیں۔

(جاری ہے)

اسی طرح 100 میٹر اور 200 میٹر ریس کے دلچسپ مقابلے بھی منعقد کیے گئے، جن میں نوجوان کھلاڑیوں نے بھرپور جوش و خروش کے ساتھ حصہ لیا۔

افتتاحی تقریب کے موقع پر مقررین نے کھیلوں کی اہمیت پر روشنی ڈالی اور نوجوانوں کی حوصلہ افزائی کرتے ہوئے کہا کہ ایسے ایونٹس نہ صرف ٹیلنٹ کو سامنے لاتے ہیں بلکہ نوجوانوں کو صحت مند سرگرمیوں کی طرف راغب کرتے ہیں۔ ایونٹ کا فائنل 24 جون کو گنگھوٹی گراؤنڈ روہڑی میں کھیلا جائے گا جس کے لیے کھلاڑیوں اور شائقین میں جوش و خروش دیکھنے کو مل رہا ہے۔یہ پورا ایونٹ سپورٹس اینڈ یوتھ افیئرز ڈپارٹمنٹ، حکومت سندھ کی جانب سے منعقد کیا گیا ہے، جس کا مقصد نوجوانوں کو کھیلوں کے میدان میں مواقع فراہم کرنا اور ان کی صلاحیتوں کو فروغ دینا ہے۔

Facebook Twitter Google + Share on Whatsapp

روہڑی میں کھیلوں کے بڑے ایونٹ کا افتتاح کر دیا گیا

متعلقہ عنوان :

مزید کھیلوں کی خبریں