محمد آصف نے ایشین 6 ریڈ اسنوکر چیمپئن شپ کے سیمی فائنل کیلئے کوالیفائی کرلیا

منگل 24 جون 2025 22:35

کولمبو (اُردو پوائنٹ اخبارتازہ ترین - این این آئی۔ 24 جون2025ء)کولمبو میں جاری ایشین 6 ریڈ اسنوکر چیمپئن شپ میں پاکستان کے محمد آصف نے سیمی فائنل کے لیے کوالیفائی کر لیا۔ایشین سکس ریڈ اسنوکر چیمپئن شپ کے کوارٹر فائنل میں ملائیشیا کے لم کاک لیونگ کے خلاف محمد آصف نے شاندار آغاز کیا اور ابتدائی 3 فریمز 67-0، 43-21 اور 27-19 کے اسکور سے جیت کر 3-0 کی برتری حاصل کر لی۔

(جاری ہے)

ملائیشین کیویسٹ نے چوتھے فریم میں کم بیک کیا اور پانچویں فریم میں محمد آصف سے بلیک بال مس ہونے کا فائدہ اٹھا کر اپنے خسارے کو مزید کم کرتے ہوئے 3-2 کر دیا۔محمد آصف نے چھٹا فریم جیت کر ایک بار پھر برتری کو بہتر کیا تاہم ساتویں فریم میں لم کاک لیونگ نے آصف کو ایک بال بھی پوٹ نہیں کرنے دی۔بیسٹ آف 9 کوارٹر فائنل کے آٹھویں فریم میں بھی حتمی کل بالز تک دونوں پلیئرز میں کانٹے دار مقابلہ برابر رہا۔آخری لمحات میں ملائیشین پلیئر نے پنک بال مس کی جس کے بعد آصف نے اس گیند کو پوٹ کر کے فتح مکمل کی۔محمد آصف کی کامیابی کا اسکور 67-0، 43-21، 27-19، 5-59، 32-41، 38-25، 0-68 اور 35-21 رہا۔