بھارت کو ایک اور عبرت ناک شکست

انگلینڈ نے صرف ایک دن میں پہاڑ جیسا ہدف حاصل کر لیا

محمد علی منگل 24 جون 2025 22:48

لیڈز (اُردو پوائنٹ اخبارتازہ ترین۔ 24 جون 2025ء ) بھارت کو ایک اور عبرت ناک شکست، انگلینڈ نے صرف ایک دن میں پہاڑ جیسا ہدف حاصل کر لیا، انگلش بلے بازوں نے 371 رنز کا مطلوبہ ہدف 5 وکٹوں کے نقصان پر حاصل کر لیا۔ پانچ ٹیسٹ کی سیریز کے پہلے میچ میں بھارت کی ٹیم گزشتہ روز دوسری اننگز میں 370 رنز کی برتری کے ساتھ 364 رنز بنا کر آؤٹ ہوگئی تھی۔ بھارت کی جانب سے کے ایل راہول 137 اور رشبھ پنت 118 رنز بنا کر آؤٹ ہوئے۔

(جاری ہے)

سائی سدھرشن 30، کرن نائر 20، کپتان شبھمن گل 8، یشسوی جیسوال اور شرادل ٹھاکر 4، 4 رن بنا کر آؤٹ ہوئے جبکہ محمد سراج، جسپریت بمراہ اور پراسد کرشنا بغیر کھاتا کھولے پویلین لوٹے۔ رویندرا جڈیجا 25 رنز بنا کر ناٹ آؤٹ پویلین لوٹے۔ انگلینڈ کی جانب سے جوش ٹنگ اور برائڈن کارس نے 3، 3، ثاقب بشیر نے 2 جبکہ کرس ووکس اور کپتان بین اسٹوکس نے 1، 1 کھلاڑی کو آؤٹ کیا۔ ہدف کے تعاقب میں انگلینڈ نے دھواں دار بلے بازی کی اور صرف ایک دن کے کھیل کے دوران 350 رنز بنا ڈالے۔