ایف ڈی اے کا مختلف پرائیویٹ ہاؤسنگ سکیموں میں سرکاری ملکیت کی پبلک یوٹیلٹی سائٹس کے مختلف رقبہ جات فروخت کرنے کا فیصلہ

فیصل آباد (اُردو پوائنٹ اخبارتازہ ترین - اے پی پی۔ 23 جون2025ء) ایف ڈی اے نے مختلف پرائیویٹ ہاؤسنگ سکیموں میں سرکاری ملکیت کی پبلک یوٹیلٹی سائٹس کے مختلف رقبہ جات فروخت کرنے کا فیصلہ کیا ہے جوکہ تعلیم و صحت کی سہولیات کے لئے مختص ہیں۔ اس سلسلے میں نیلامی بدھ 25 جون 2025 کو گیارہ بجے دن ایف ڈی اے کمپلیکس بالمقابل سول ہسپتال میں منعقد ہوگی۔ یہ بات ڈائریکٹر جنرل ایف ڈی اے محمد آصف چوہدری کی زیر صدارت اجلاس کے دوران بتائی گئی جس میں ایف ڈی اے کے ملیکتی مختلف رہائشی و کمرشل پلاٹس کی فروخت و لیز پر دینے کیلئے نیلام عام کے انتظامات کا جائزہ لیاگیا۔

اجلاس میں ایڈیشنل ڈائریکٹر قیصر عباس رند، ڈائریکٹر اسٹیٹ مینجمنٹ l جنید حسن منج، ڈائریکٹر اسٹیٹ مینجمنٹ ll، ڈائریکٹر آئی ٹی یاسر اعجاز چٹھہ، ڈپٹی ڈائریکٹر فنانس فیصل طارق بٹ ودیگر افسران نے شرکت کی۔

(جاری ہے)

اس موقع پر بتایا گیا کہ تعلیم وصحت کی سہولیات کے لئے مختص پلاٹ مختلف علاقوں کی چالیس منظور شدہ پرائیویٹ ہاؤسنگ سکیموں میں واقع ہیں جبکہ ایف ڈی اے کے زیر کنٹرول رہائشی کالونیوں احمد نگر، علامہ اقبال کالونی اور ملت ٹاؤن میں بھی پندرہ یوٹیلٹی سائٹس بھی نیلامی میں شامل ہیں۔

مزید برآں احمد نگر اور ملت ٹاؤن کے کمرشل سنٹرز میں 146 دکانوں کے پلاٹس بھی نیلامی میں فروخت کئے جائیں۔ اسی طرح ایف ڈی اے کے ملیکتی گلستان کالونی ملت روڈ میں موجود گلستان پلازہ کے اپر گراؤنڈ فلور، لوئرگراؤنڈ فلور، فرسٹ فلور او ر سکینڈ فلورکی دکانیں اور روف ٹاپ پر اوین جگہ کرایہ داری پر دینے کیلئے نیلام عام میں شامل کی گئی ہیں۔ علاوہ ازیں پچیس سالہ لیز کے لئے مدینہ ٹاؤن میں ہاکی سٹیڈیم سے ملحقہ 4.65 کنال رقبہ، سکول کے لئے آئرن مارکیٹ میں گیارہ مرلے، 0.14 کنال ٹرک سٹینڈ جھنگ روڈ، 0.35 کنال احمد نگر، 0.71 کنال رقبہ ملت ٹاؤن میں بنک کے قیام کے لئے لیز پر دینے کے لئے بولی میں پیش کئے جائیں گے۔

ڈائریکٹر اسٹیٹ مینجمنٹ جنید حسن منج نے نیلامی کی شرائط قواعد وضوابط ودیگر تفصیلات سے آگا ہ کیا اور بتایاکہ نیلامی میں خریدے گئے یا کرایہ پر لئے گئے پلاٹس کو کسی دیگر مقاصد کے لئے استعمال نہیں کیاجا سکے گا جبکہ تمام ٹیکسز بذمہ کامیاب بولی دھندہ ہونگے۔ ڈائریکٹر جنرل ایف ڈی اے نے ہدایت کی کہ نیلامی کے تمام عمل کو مکمل شفاف اور منظم رکھا جائے اس سلسلے میں بولی دھندہ کے لئے ہرممکن انتظامی سہولیات و آسانیاں فراہم کریں۔ انہوں نے کہا کہ نیلامی میں پیش کئے جانیوالے پلاٹس کی تفصیلات کو بھرپور انداز میں مشتہر کیاجائے تاکہ زیادہ سے زیادہ خواہش مند افراد بولی کے عمل میں حصہ لیں سکیں۔