ڈسٹرکٹ پولیس آفیسر سیالکوٹ کا سیالکوٹ کے مختلف تھانوں میں کھلی کچہریوں کا انعقاد،مسائل سن کر ازالہ کیلئے احکامات جاری

پیر 23 جون 2025 23:00

سیالکوٹ (اُردو پوائنٹ اخبارتازہ ترین - اے پی پی۔ 23 جون2025ء) ڈسٹرکٹ پولیس آفیسر سیالکوٹ فیصل شہزاد نے تحصیل ڈسکہ کے مختلف علاقوں میں کھلی کچہریوں کا انعقاد کیا اور شہریوں کے مسائل سن کر ازالہ کیلئے احکامات جاری کیے۔ ترجمان سیالکوٹ پولیس کے مطابق ڈسٹرکٹ پولیس آفیسر (ڈی پی او) سیالکوٹ فیصل شہزاد نے ہلٹن میرج ہال پیرس روڈ تھانہ سول لائن،ضلع کونسل ہال قلعہ تھانہ کوتوالی،دعوت میرج ہال کمیلہ روڈ تھانہ رنگپورہ اور جناح ایفشینسی سکول کینٹ تھانہ کینٹ میں کھلی کچہریوں کا انعقاد کیا، لوگوں کی بڑی تعداد موجود تھی۔

انہوں نے کھلی کچہری کے موقع پر لوگوں کے مسائل دریافت کئے اور متعلقہ ایس ایچ اوز کو فوری انصاف کے احکامات جاری کیے اور جلد رپورٹس جمع کروانے کی ہدایات بھی جاری کیں۔

(جاری ہے)

انہوں نے زیادہ تر لوگوں کے مسائل موقع پر ہی حل کردیے اور کھلی کچہری میں موجود لوگوں نے ڈی پی اوکو تالیاں بجا کر خراج تحسین پیش کیا۔ڈی پی او نے کہا کہ لوگوں کو جلد انصاف اور انصاف ان کی دہلیز پر فراہم کرنا ہماری اولین ترجیح ہے اور لوگوں کے مسائل حل کرکے مجھے جلد رپورٹ پیش کی جائے۔انہوں نے مزید کہا کہ کھلی کچہری کا سلسلہ جاری رہے گا،جرائم پیشہ عناصر کو کسی قسم کی رعایت نہیں دی جائے گی اور علاقے سے جرائم کا خاتمہ کیا جائے گا۔