کراچی: تیز رفتار واٹر ٹینکر نے ایک اور موٹر سائیکل سوار شہری کو کچل دیا،ڈرائیور گرفتار ٹینکرضبط

منگل 24 جون 2025 16:55

کراچی(اُردو پوائنٹ اخبارتازہ ترین - این این آئی۔ 24 جون2025ء)شہر قائد میں ہیوی ٹریفک کے حادثات میں عام شہریوں کے جاں بحق ہونے کا سلسلہ نہ تھم سکا۔منگل کی صبح شرافی گوٹھ تھانے کے علاقے لانڈھی فیوچر موڑ کے قریب تیز رفتار واٹر ٹینکر نمبر ٹی ایل ای 775 کی زد میں آکر موٹرسائیکل رجسٹریشن نمبر پر کے ای زیڈ 2146 پر سوار شخص جاں بحق ہوگیا جس کی لاش قانونی کارروائی کے لیے جناح اسپتال منتقل کی گئی۔

(جاری ہے)

خوفناک حادثے میں جاں بحق شخص کی شناخت 27 سالہ محمد فسیح ولد عبدالباسط کے نام سے کی گئی جو لانڈھی بھٹو نگر کا رہائشی تھا۔ایس ایچ او شرافی گوٹھ راو خالد نے بتایا کہ حادثے کی اطلاع ملنے پر پولیس موقع پر پہنچ گئی تھی اور فوری کارروائی کرتے ہوئے واٹرٹینکر کے ڈرائیورطاہر خان ولد سید محمود کو گرفتار کرکے تھانے منتقل کردیا جبکہ واٹر ٹینکر کو تحویل میں لے لیا۔گرفتار ڈرائیور کے خلاف مزید قانونی کارروائی عمل میں لائی جا رہی ہے جبکہ متوفی شخص کے اہلخانہ کو تلاش کیا جا رہا ہے۔