عراق کے دارالحکومت بغداد میں دھماکے، کوئی جانی نقصان نہیں ہوا

منگل 24 جون 2025 18:22

بغداد (اُردو پوائنٹ اخبارتازہ ترین - این این آئی۔ 24 جون2025ء)عراق کے دارالحکومت بغداد میں دھماکے ہوئے ہیں، عراقی فوجی عہدیدار نے بتایا ہے کہ شمالی بغداد کے کیمپ تاجی ملٹری بیس کو ڈرون نے نشانہ بنایا گیا ہے۔غیر ملکی خبررساں ادارے کے مطابق عراق کی سرکاری خبر رساں ایجنسی نے منگل کی صبح ایک فوجی عہدیدار کے حوالے سے رپورٹ کیا ہے کہ ایک نامعلوم ڈرون نے بغداد کے شمال میں واقع تاجی ملٹری بیس پر موجود ایک فوجی ریڈار کو نشانہ بنایا۔

(جاری ہے)

بغداد آپریشنز کے کمانڈر کے مطابق اس حملے میں کوئی جانی نقصان نہیں ہوا، کیمپ تاجی ملٹری بیس عراقی اور اتحادی افواج کے زیر استعمال ہے۔یاد رہے کہ سال 2020 میں امریکی قیادت میں بین الاقوامی اتحاد کی افواج نے اس اڈے سے انخلا کیا تھا اور اسے عراقی سیکیورٹی فورسز کے حوالے کر دیا گیا تھا، اس اڈے پر ماضی میں 2 ہزار تک اتحادی فوجی تعینات رہے تھے۔بغداد سے 20 کلومیٹر (12 میل) شمال میں واقع یہ فوجی اڈہ، امریکی قیادت میں موجود افواج کے خلاف ایران نواز ملیشیاؤں کے راکٹ حملوں کا نشانہ بنتا رہا ہے۔