باکسر عالیہ سومرو کو دھمکیاں، سوشل میڈیا پر ویڈیو وائرل ہونے پر پولیس حرکت میں آگئی

بدھ 25 جون 2025 16:34

کراچی (اُردو پوائنٹ اخبارتازہ ترین - این این آئی۔ 25 جون2025ء)پاکستانی باکسر عالیہ سومرو کو سوشل میڈیا پر دھمکیاں ملنے اور ویڈیو بیان وائرل ہونے کے بعد کراچی پولیس حرکت میں آگئی۔لیاری کی رہائشی عالیہ سومرو نے اپنا ویڈیو بیان سوشل میڈیا پر پوسٹ کیا، جو وائرل ہوگیا، جس میں کہا گیا کہ ایک شخص جو ماضی میں لیاری گینگ وار کا سہولت کار اور اب جعلی میڈیا کا نمائندہ ہے، اس کی جانب سے ہراساں کیا جارہا ہے۔

پولیس حکام نے واقعے کا نوٹس لے لیا۔

(جاری ہے)

ایس ایس پی سٹی عارف عزیز نے کہا کہ عالیہ سومرو کو واٹس ایپ پر دھمکیاں ملی ہیں، واقعے کی تحقیقات کررہے ہیں۔انہوں نے کہا کہ باکسر عالیہ سومرو نے خود پولیس سے سیکیورٹی کیلئے رابطہ کیا تھا۔ایس ایس پی سٹی کے مطابق بچی قومی ہیرو ہے، اسے سیکیورٹی کی یقین دہانی کروائی تھی، واٹس پر نامعلوم شخص کی جانب سے رقم کا تقاضا کیا گیا تھا۔ایس ایس پی سٹی کا بتانا ہے کہ عالیہ سومرو کے معاملے کو تحقیقات کے سلسلے میں ایف آئی اے کے حوالے کیا جانا تھا، تاہم اب عالیہ سومرو کے والدین نے قانونی کارروائی سے انکار کردیا ہے۔والدین کے مطابق لیاری کے بزرگوں اور ان کے درمیان معاملات طے پاگئے ہیں۔