غلافِ کعبہ کی تبدیلی، روح پرور تقریب کاانعقاد

مسجد الحرام کے آئمہ کرام، کسوہ فیکٹری کے ماہرین، اعلی حکام اور خصوصی ٹیم کی شرکت

بدھ 25 جون 2025 22:17

غلافِ کعبہ کی تبدیلی، روح پرور تقریب کاانعقاد

مکہ مکرمہ(اُردو پوائنٹ اخبارتازہ ترین - این این آئی۔ 25 جون2025ء)نئے اسلامی سال کے آغاز پر مسجد الحرام میں غلافِ کعبہ کی تبدیلی کی روح پرور اور بابرکت تقریب بدھ کو نمازِ عصر کے بعد منعقد کی گئی،میڈیارپورٹس کے مطابق غلافِ کعبہ کی تیاری اور تبدیلی کا عمل خادم الحرمین الشریفین شاہ سلمان بن عبدالعزیز کی نیابت میں گورنر مکہ مکرمہ کی سربراہی میں انجام دی گئی جس میں مسجد الحرام کے آئمہ کرام، کسوہ فیکٹری کے ماہرین، اعلی حکام اور خصوصی ٹیم شریک ہوئی،غلافِ کعبہ کی تیاری کا عمل انتہائی مہارت اور عقیدت سے مکمل کیا جاتا ہے، جس میں دو سو سے زائد ماہر کاریگر اور فنکار شریک ہوتے ہیں۔

کسوہ فیکٹری میں 11 ماہ کی مسلسل محنت سے تیار کیا گیا یہ نیا غلاف مجموعی طور پر 1,415 کلوگرام وزنی ہے۔

(جاری ہے)

غلاف میں 1,000 کلوگرام خالص سِلک (ریشم)استعمال کیا گیا ہے، جب کہ اس پر 120 کلوگرام سونے اور 100 کلوگرام چاندی سے تیار کردہ دھاگوں سے قرآنی آیات کی کشیدہ کاری کی گئی ہے۔ نیا غلاف چار بڑے ٹکڑوں کے ساتھ درمیانے اور چھوٹے 47 حصوں پر مشتمل ہے۔تقریب کا آغاز نمازِ عصر کے بعد پرانے غلاف کے سنہری حصوں کو احتیاط سے ہٹانے سے ہوا جب کہ مکمل طور پر نیا غلاف نمازِ عشا کے بعد کعبہ شریف پر چڑھایاگیا۔ یہ لمحے پوری امت مسلمہ کے لیے روحانی اہمیت رکھتے ہیں، جسے لاکھوں فرزندانِ توحید دنیا بھر سے عقیدت و احترام سے دیکھتے ہیں۔