نئے اسلامی سال 1447 ہجری کے آغاز پر غلافِ کعبہ کی تبدیلی کی روح پرور تقریب

عرفان کھٹانہ بدھ 25 جون 2025 20:02

مکہ مکرمہ(اُردو پوائنٹ اخبارتازہ ترین۔ 25 جون 2025ء) نئے اسلامی سال کے آغاز پر آج مسجد الحرام میں غلافِ کعبہ کی سالانہ تبدیلی کی پر وقار اور روحانی تقریب منعقد ہوگی۔ پوری دنیا کے مسلمان اس مقدس موقع کو عقیدت اور احترام کے ساتھ دیکھنے کے لیے بیتابی سے منتظر ہیں۔تقریب کا آغاز نمازِ عصر کے فوراً بعد پرانے غلاف کے سنہری حصوں کو اتارنے سے ہوگا، اور نیا غلاف نمازِ عشاء کے بعد کعبہ شریف پر چڑھایا جائے گا۔

یہ عمل ہر سال انتہائی احتیاط، دینی جوش اور جذبے کے ساتھ کیا جاتا ہے۔
غلافِ کعبہ کی تیاری کسوہ فیکٹری میں تقریباً 11 ماہ کی محنت کا متقاضی ہے جہاں رواں برس 200 ماہر کاریگروں نے حصہ لیا۔ غلاف کی تیاری کے لیے 1,000 کلوگرام خالص ریشم، 120 کلوگرام سونے کے دھاگے، اور 100 کلوگرام چاندی کے دھاگے استعمال کیے گئے ہیں۔

(جاری ہے)

یہ غلاف چار بڑے اور 47 درمیانے و چھوٹے ٹکڑوں پر مشتمل ہے اور اس کا مجموعی وزن 1,415 کلوگرام ہے۔

اس پر قرآن کی آیات نفیس کشیدہ کاری کے ذریعے نہایت خوبصورتی سے نقش کی جاتی ہیں۔تقریب میں خادم الحرمین الشریفین شاہ سلمان بن عبدالعزیز کی جانب سے گورنر مکہ مکرمہ، مسجد الحرام کے آئمہ کرام اور کسوہ فیکٹری کے 159 ماہرین و کارکن شریک ہوں گے۔ یہ تقریب امت مسلمہ کے اتحاد، دین اسلام کی مرکزیت اور عقیدت و محبت کا عملی مظہر ہے۔یہ مقدس موقع ہر سال لاکھوں مسلمانوں کے لیے ایمان کی تجدید اور روحانی احساس کا باعث بنتا ہے۔