جیف بیزوس کی ’صدی کی مہنگی ترین شادی‘ کی تیاریاں جاری، مقام تبدیل کرنا پڑ گیا

وینس ( اُردو پوائنٹ اخبارتازہ ترین۔ 26 جون 2025ء ) دنیا معروف ارب پتی شخص اور ایمیزون کے بانی جیف بیزوس نے اٹلی کے شہر وینس میں مظاہروں کے باعث ٹی وی کی سابق میزبان اور پروگرام پیش کرنے والی خاتون لارین سانچیز کے ساتھ اپنی شادی کی تقریب کا مقام تبدیل کردیا۔ عالمی میڈیا کے مطابق وینس کے ایک مشہور اور مرکزی نائٹ لائف کے علاقے کیناریگیو کے سکولا گرانڈ دی سانتا ماریا ڈیلا میسریکورڈیا میں صدی کی مہنگی ترین شادی منعقد کیے جانے کی اطلاعات تھیں، تاہم اب حفاظتی وجوہات کی بناء پر اس تقریب کو لگون شہر کے ایک الگ تھلگ اور کم قابل رسائی والے حصے میں منتقل کر دیا گیا ہے۔

بتایا گیا ہے کہ اس تقریب کے کافی تذکرے ہیں جسے "صدی کی مہنگی ترین شادی" کا نام دیا گیا ہے، جیف بیزوس کی شادی کی تقریب میں تقریباً 250 اہم مہمانوں کے شریک ہونے کی توقع ہے، اس میں امریکی صدر ڈونلڈ ٹرمپ کی بیٹی ایوانکا اور ان کے شوہر جیراڈ کشنر سمیت مشہور شخصیات شرکت کرنے والی ہیں اور اطلاعات ہیں کہ یہ دونوں پہلے ہی وینس پہنچ چکے ہیں۔

(جاری ہے)

معلوم ہوا ہے کہ شادی کی تقریب شہر کے آرسنیل میں منعقد کی جائے گی، یہ جگہ وینس بینالے آرٹ میلے کے نمائش کا مقام ہے، یہ مقام شہر کے مرکزی علاقے سے دور واقع ہے جو اصل میں 15ویں صدی میں اپنے عروج کے دور میں وینیشین ریپبلک کی سمندری سروس کا ایک شپ یارڈ تھا، یہ علاقہ پانی سے گھرا ہوا ہے جس کی وجہ سے جب پل بنائے جاتے ہیں تو زمینی راستے سے اس تک رسائی ناممکن ہو جاتی ہے، اسی لیے اس مقام کو قرون وسطیٰ کے اس سابق مذہبی سکول سے زیادہ محفوظ سمجھا جاتا ہے جہاں ابتدائی طور پر شادی کی پارٹی کا انعقاد ہونا تھا۔

بتایا جارہا ہے کہ صدی کی اس مہنگی ترین شادی کی صحیح تاریخ اور مقام کو سکیورٹی وجوہات کی بنا پر اب تک خفیہ رکھا گیا ہے کیوں کہ مقامی رہائشیوں اور مختلف گروپوں سمیت مظاہرہ کرنے والے افراد اس شادی کی تقریب کے خلاف ہفتوں سے احتجاجی ریلیاں نکال رہے تھے، ان کی دلیل تھی کہ یہ تقریب شہر کو امیروں کے لیے ایک نجی تفریحی پارک میں تبدیل کر دے گی، مظاہرین نے حکام سے مطالبہ کیا کہ سیاحوں کی ضروریات پر مقامی ضروریات کو ترجیح دیں۔

اس حوالے سے شہر کے صدر لوکا زیا کا مؤقف ہے کہ شادی اور اس موقع پر منعقد ہونے والی پارٹیوں پر 55 ملین ڈالر کی لاگت متوقع ہے، شادی کی تقریب کے موقع پر بیزوس بڑے پیمانے پر خیراتی عطیات بھی دیں گے جس میں ایک ملین یورو کی وہ رقم بھی شامل ہے جو وینس کے لیگون ماحولیاتی نظام کا مطالعہ کرنے والے ایک تعلیمی ادارے کو دی جائے گی، تقریبات سے مقامی کاروباروں کو 55 ملین ڈالر تک کی آمدن ہوگی جس میں مہمانوں کو قریبی ہوائی اڈوں تک لے جانے کے لیے 90 نجی جیٹ طیاروں کی خدمات بھی شامل ہیں۔