ج*لاہور کی خوبصورتی کی بحالی، ضلعی انتظامیہ کے میگا آپریشنز میں تیزی

}24 گھنٹوں میں متعدد علاقوں سے تجاوزات ہٹا کر شہر کو صاف کیا گیا ض*ٹریفک کی روانی بہتر بنانے اور عوامی مقامات کی بحالی کے لیے کارروائیاں جاری

جمعرات 26 جون 2025 21:15

لاہور (اُردو پوائنٹ اخبارتازہ ترین - آن لائن۔ 26 جون2025ء) ڈپٹی کمشنر لاہور سید موسیٰ رضا کی قیادت میں ضلعی انتظامیہ لاہور نے شہر کی خوبصورتی کو بحال کرنے اور تجاوزات کے خاتمے کے لیے اپنی کوششوں میں تیزی لاتے ہوئے وسیع پیمانے پر آپریشنز کیے ہیں۔ وزیراعلیٰ پنجاب کی ہدایات پر عمل پیرا ہوتے ہوئے، انتظامیہ نے گزشتہ 24 گھنٹوں کے دوران لاہور کے مختلف علاقوں بشمول برکت چوک، گرین ٹاؤن، اور جوہر ٹاؤن میں کامیاب گرینڈ آپریشنز کیے، جس کے نتیجے میں 26 ٹرک سامان ضبط کیا گیا۔

(جاری ہے)

ان میگا آپریشنز کا مقصد عوامی مقامات کی بحالی اور شہر میں ٹریفک کے بہاؤ کو بہتر بنانا ہے، جو کہ شہریوں کی سہولت کے لیے انتہائی ضروری ہیں۔ میٹروپولیٹن آفیسر ریگولیشن ہیڈکوارٹر کاشف جلیل نے شہریوں پر زور دیا ہے کہ وہ شہری ضوابط کی پابندی کریں اور تجاوزات سے گریز کریں۔ ڈپٹی کمشنر لاہور سید موسیٰ رضا نے واضح کیا ہے کہ تجاوزات کا مکمل خاتمہ ہونے تک یہ آپریشنز جاری رہیں گے اور وزیراعلیٰ پنجاب کے لاہور کو تجاوزات سے پاک بنانے کے وڑن پر سختی سے عملدرآمد کیا جا رہا ہے۔