سیکورٹی خدشات، پنجاب بھرمیں آج سے دفعہ 144 نافذ مجالس، جلوسوں کی ڈرون کوریج پر پابندی

محکمہ داخلہ پنجاب نے دفعہ 144 کے نفاذ کا نوٹیفکیشن جاری کردیا،جلوسوں، عوامی اجتماعات، اسلحے کی نمائش اور اشتعال انگیز مواد پر مکمل پابندی عائد، تمام پابندیاں یکم تا 10 محرم الحرام نافذ العمل رہیں گی، جبکہ ڈبل سواری پر پابندی 9 اور 10 محرم کو مؤثر ہو گی ، محکمہ داخلہ پنجاب

فیصل علوی جمعہ 27 جون 2025 11:29

سیکورٹی خدشات، پنجاب بھرمیں آج سے دفعہ 144 نافذ مجالس، جلوسوں کی ڈرون ..

لاہور(اردوپوائنٹ اخبار تازہ ترین۔27جون 2025)پنجاب بھرمیں محرم الحرام سکیورٹی کے پیش نظر آج سے دفعہ 144 نافذ مجالس، جلوسوں کی ڈرون کوریج پر پابندی عائدکر دی گئی، محکمہ داخلہ پنجاب نے دفعہ 144 کے نفاذ کا نوٹیفکیشن جاری کردیا، محرم الحرام کے دوران مجالس اور جلوسوں کی ڈرون کوریج پر مکمل پابندی ہے ، خلاف ورزی پر کارروائی ہوگی، محرم الحرام کے دوران امن و امان برقرار رکھنے کیلئے پنجاب حکومت نے صوبہ بھر میں دفعہ 144 نافذ کر دی،پنجاب بھر میں ڈبل سواری پر بھی پابندی عائد کی گئی ہے۔

محکمہ داخلہ کے مطابق تمام پابندیاں یکم تا 10 محرم الحرام نافذ العمل رہیں گی، جبکہ ڈبل سواری پر پابندی 9 اور 10 محرم کو مؤثر ہو گی۔محکمہ داخلہ پنجاب کے مطابق یہ فیصلہ حساس صورتحال کے تناظر میں کیا گیا ہے جس کا اطلاق آج 27 جون سے 6 جولائی 2025 تک ہوگا 7 مختلف نوعیت کی پابندیاں عائد کی گئی ہیں جن میں جلوسوں، عوامی اجتماعات، اسلحے کی نمائش اور اشتعال انگیز مواد پر مکمل پابندی شامل ہے۔

(جاری ہے)

عمارتوں کی چھتوں پر پتھر، اینٹیں، بوتلیں یا کچرا جمع کرنے پر بھی پابندی عائد ہے جبکہ جلوس کے دوران راستے میں واقع عمارتوں کی چھتوں یا دکانوں کے تھڑوں پرجمع ہونے پرپابندی ہوگی۔محکمہ داخلہ کا کہنا ہے کہ محرم الحرام کے دوران صرف منظور شدہ جلوس اور مجالس کی اجازت ہوگی کسی بھی نئی اختراع یا غیر منظور شدہ سرگرمی کی اجازت نہیں دی جائے گی۔

پنجاب بھر کے تمام ضلعی و پولیس حکام کو ہدایت جاری کر دی گئی ہے کہ دفعہ 144 کی خلاف ورزی کرنے والوں کے خلاف فوری کارروائی کی جائے گی۔دوسری جانب لاہورسمیت صوبہ بھر میں 25 ہزار سے زائد افسران و اہلکار جلوسوں اور مجالس کی سکیورٹی سر انجام دے رہے ہیں۔ یکم محرم الحرام پر صوبائی دارالحکومت میں 2600 سے زائد پولیس افسران و اہلکار سکیورٹی ڈیوٹی پر مامور ہیں۔ترجمان پنجاب پولیس کا کہنا ہے کہ آج صوبہ بھر میں مجالس اور عزاداری جلوسوں کے سکیورٹی انتظامات میں 32 ہزار سے زائد کمیونٹی رضا کار معاونت فراہم کر رہے ہیں۔ترجمان پولیس کے مطابق صوبہ بھر میں آج 96 عزاداری جلوس، 3253 مجالس منعقد ہورہی ہیں لاہور میں یکم محرم کی مناسبت سے 10 عزاداری جلوس برآمد، 402 مجالس منعقد ہورہی ہیں۔