اضلاع کے زخمی اہلکاروں کو طبی اخراجات کی ادائیگی کیلئے مزید 28لاکھ روپے کی رقم جاری

پولیس غازیوں کا بہترین علاج معالجہ، جلد از جلد بحالی اولین ترجیح ہے‘آئی جی پنجاب ڈاکٹر عثمان انور

جمعہ 27 جون 2025 14:15

لاہور (اُردو پوائنٹ اخبارتازہ ترین - این این آئی۔ 27 جون2025ء) آئی جی پنجاب ڈاکٹر عثمان انور دوران ڈیوٹی زخمی ہونے والے غازی اہلکاروں کے بہترین علاج معالجے کیلئے پرعزم ہیں ، لاہور سمیت مختلف اضلاع کے زخمی اہلکاروں کو طبی اخراجات کی ادائیگی کے لئے مزید 28لاکھ روپے کی رقم جاری کر دی گئی ۔

(جاری ہے)

ترجمان پنجاب پولیس کے مطابق زخمی کانسٹیبل ناصر حسین کو میڈیکل اخراجات کیلئے 15 لاکھ روپے فنڈز جاری، زخمی کانسٹیبل عدنان حبیب کو طبی اخراجات کیلئے 10 لاکھ روپے جاری کیے گئے، زخمی ریٹائرڈ انسپکٹر اعظم محمود کو میڈیکل اخراجات کیلئے ایک لاکھ روپے دئیے گئے، زخمی کانسٹیبل فیاض احمد کو علاج معالجے کی مد میں ایک لاکھ روپے دئیے گئے، زخمی اے ایس آئی شمریز اسلم کو طبی اخراجات کیلئے ایک لاکھ روپے فنڈز جاری کیے گئے ۔

ایڈیشنل آئی جی ویلفیئر عمران ارشاد کی زیر صدارت کمپنسیشن ایوارڈ کمیٹی نے فنڈز اجرا کی منظوری دی گئی۔ اس حوالے سے آئی جی پنجاب ڈاکٹر عثمان انور نے کہا کہ پولیس غازیوں کا بہترین علاج معالجہ، جلد از جلد بحالی اولین ترجیح ہے، غازی اہلکاروں کی بہترین ہیلتھ ویلفیئر کیلئے کوئی کسر نہ اٹھا رکھی جائے۔