انسانیت کی خدمت کا جذبہ رنگ،مذہب اور ہر تعصب سے بالاتر ہے،وزیراعلی پنجاب مریم نواز شریف

منگل 19 اگست 2025 17:07

لاہور (اُردو پوائنٹ اخبارتازہ ترین - اے پی پی۔ 19 اگست2025ء) وزیراعلی پنجاب مریم نواز شریف نے کہا ہے کہ وہ دنیا بھر کے انسانیت کے خدمت گاروں کو سلام پیش کرتی ہیں۔ انسانیت عظیم نسبت ہے جو تمام رشتوں سے بلند اور ہر سرحد سے بے نیاز ہے۔ دوسروں کے لئے راحت، آسودگی اور آسانیوں کا وسیلہ بننا انسانیت کی خدمت ہے۔ وزیراعلی مریم نواز شریف نے انسانی ہمدردی کے عالمی دن پراپنے پیغام میں کہا کہ انسانیت کی خدمت کا جذبہ رنگ،مذہب اور ہر تعصب سے بالاتر ہے۔

(جاری ہے)

موجودہ عالمی حالات کے تناظرمیں انسانیت کی خدمت کا جذبہ پہلے سے کہیں زیادہ ضروری ہے۔ وزیر اعلی نے کہا کہ غزہ کے معصوم شہیدانسانیت کے ضمیر کو جھنجھوڑ رہے ہیں۔غزہ کے بچوں اور کشمیریوں کی آہیں دنیا کے ہر حساس دل کو پکار رہی ہیں۔انسان سے ہمدردی عبادت کے مترادف ہے، یہی سب سے بڑی خدمت ہے۔وزیراعلی مریم نواز شریف نے کہا کہ حکومت پنجاب کا ہر اقدام اور پراجیکٹ انسانی ہمدردی اور عوام کی خدمت کے لئے ہے۔آئیں ہم ایسی دنیا بنائیں جہاں امن،محبت اور انسانیت ہو۔