ڈیف بلائنڈ افراد کی سرپرستی اور حوصلہ افزائی اجتماعی ذمہ داری ہے،مریم نواز شریف

جمعہ 27 جون 2025 18:28

لاہور (اُردو پوائنٹ اخبارتازہ ترین - اے پی پی۔ 27 جون2025ء) وزیراعلیٰ پنجاب مریم نواز شریف نے کہا ہے کہ ڈیف بلائنڈ افراد کی سرپرستی اور حوصلہ افزائی اجتماعی ذمہ داری ہے،ہمت کارڈ کے ذریعے تمام سپیشل افراد کی باعزت معاشی معاونت کر رہے ہیں۔جمعہ کے روز ڈیف بلائنڈ نس ڈے کے موقع پر جاری اپنے ایک پیغام میں انہوں نے کہا کہ بیک وقت سماعت اور بصیرت سے محروم افرا د بہت ہی سپیشل افراد ہیں،ڈیف بلائنڈ نہ بوجھ ہیں نہ بیکار،بلکہ حوصلے اور خود داری کی جیتی جاگتی تصویر ہیں،ڈیف بلائنڈ افراد کی سرپرستی اور حوصلہ افزائی اجتماعی ذمہ داری ہے۔

انہوں نے کہا کہ پنجاب حکومت اس امر پر پورا یقین رکھتی ہے کہ سپیشل افراد کی بحالی احسان نہیں بلکہ ان کا حق ہے،ہمت کارڈ کے ذریعے ڈیف بلائنڈ سمیت تمام سپیشل افراد کی باعزت معاشی معاونت کر رہے ہیں۔

(جاری ہے)

وزیر اعلی نے کہا کہ ڈیف بلائنڈ سمیت سپیشل افراد کو معاون آلات فراہم کرکے زندگی کی دوڑ میں شمولیت کیلئے باعزت طریقے سے راستہ ہموار کر رہے ہیں،سپیشل ایجوکیشن ڈیپارٹمنٹ کے تحت سپیشل ایجوکیشن مراکز کو سنٹر آف ایکسی لینس میں تبدیل کیا جا رہا ہے،ڈیف بلائنڈ سمیت تمام خصوصی بچوں کو جدید تعلیم کے مواقع فراہم کئے جارہے ہیں،چاہتے ہیں کہ کوئی بچہ زندگی کی دوڑ میں اس لئے پیچھے نہ رہ جائے کہ وہ دیکھ یا سن نہیں سکتا۔