بلوچستان ، مینگل قبیلے سے تعلق رکھنے والی اہم شخصیت میر عطاالرحمن مینگل کے قتل کی ایف آئی آر درج کرلی گئی

مقدمے میں مینگل قبیلے کے سربراہ اسداللہ مینگل اور بی این پی کے سربراہ سردار اختر مینگل کے بیٹے میر گورگین مینگل سمیت ضلع خضدار کے علاقے وڈھ سے تعلق رکھنے والے چھ افراد نامزد

جمعہ 27 جون 2025 20:40

کوئٹہ (اُردو پوائنٹ اخبارتازہ ترین - این این آئی۔ 27 جون2025ء)بلوچستان میں مینگل قبیلے سے تعلق رکھنے والی اہم شخصیت میر عطاالرحمن مینگل کے قتل کی ایف آئی آر درج کرلی گئی، مقدمے میں مینگل قبیلے کے سربراہ اسداللہ مینگل اور بی این پی کے سربراہ سردار اختر مینگل کے بیٹے میر گورگین مینگل سمیت ضلع خضدار کے علاقے وڈھ سے تعلق رکھنے والے چھ افراد کو نامزد کیا گیا ہے۔

تفصیلات کے مطابق ایف آئی آر محمد جان نامی شخص کی مدعیت میں وڈھ کے علاقے آڑنجی کے لیویز تھانے میں درج کی گئی ہے جس میں یہ الزام عائد کیا گیا ہے کہ ملزمان کلاشنکوفوں کے ساتھ آئے اور فائرنگ کی جس کے نتیجے میں میر عطاالرحمان زندگی کی بازی ہار گئے اور ان کا بیٹا مطیع الرحمان زخمی ہو گیا۔ایف آئی آر میں کہا گیا ہے کہ واقعہ کے بعد ملزمان گاڑیوں میں فرار ہو گئے۔

(جاری ہے)

میر عطاالرحمان کو چند روز قبل وڈھ کے علاقے آڑنجی میں قتل کیا گیا تھا جبکہ حملے میں ان کے بیٹے زخمی ہو گئے تھے۔میر عطاالرحمان کا شمار ضلع خضدار کی اہم سیاسی اور قبائلی شخصیات میں ہوتا تھا۔ وہ بلوچستان کے سابق نگراں وزیر اعلیٰ میر نصیر مینگل کے بیٹے اور جھالاوان عوامی پینل کے سربراہ میر شفیق الرحمان مینگل کے بھائی تھے۔دوسری جانب بلوچستان نیشنل پارٹی نے پارٹی کے سربراہ کے بھتیجے اور بیٹے کے خلاف عطاالرحمان مینگل کے قتل کے مقدمے کے اندراج کی مذمت کی ہے۔

بی این پی کے رہنما اور سابق وفاقی وزیر آغا حسن بلوچ نے اس سلسلے میں ایک بیان میں اس مقدمے کو بے بنیاد قرار دیتے ہوئے کہا ہے کہ اس کا سچائی سے کوئی تعلق نہیں ہے۔آغا حسن نے اس مقدمے کو پارٹی کی بلوچستان کے حقوق کی آواز کو دبانے کی ایک سازش قرار دیتے ہوئے کہا کہ پارٹی اس مقدمے کے خلاف قانونی چارہ جوئی کرے گی۔