خلیفہ دوم حضرت عمر فاروق رضی اللہ تعالیٰ عنہ کا یوم شہادت آج دوسرے شہروں کی طرح سیالکوٹ میں انتہائی عقیدت و احترام سے منایا گیا

جمعہ 27 جون 2025 22:50

سیالکوٹ (اُردو پوائنٹ اخبارتازہ ترین - اے پی پی۔ 27 جون2025ء) خلیفہ دوم حضرت عمر فاروق رضی اللہ تعالیٰ عنہ کا یوم شہادت یکم محرم الحرام بمطابق 27 جون کو دوسرے شہروں کی طرح سیالکوٹ میں انتہائی عقیدت و احترام سے منایا گیا۔تفصیلات کے مطابق حضرت عمر فاروق کے یوم شہادت کے سلسلے میں سیالکوٹ میں مذہبی تنظیموں کی جانب سے ریلیاں نکالی گئیں اور علماء نے اپنے خطابات میں خلیفہ دوم کی اسلام کے لیے خدمات کو اجاگر کیا۔

مشہور مذہبی سکالر علامہ محسن سلیم نے حطاب کرتے ہوئے کہا کہ حضرت سیدنا عمر فاروق رضی اللہ تعالیٰ عنہ موجودہ سعودی عرب کے مقدس شہر مکہ مکرمہ میں پیدا ہوئے، آپ کا نام عمر بن خطاب، لقب فاروق اور کنیت ابو حفصہ تھی۔آپؓ کی خدمات، جرات و بہادری، فتوحات، شان دار کردار اور کارناموں سے اسلام کا چہرہ روشن ہے۔

(جاری ہے)

حضرت عمرؓ کا زمانہ خلافت اسلامی فتوحات کا دور تھا جس میں اسلامی سلطنت کی حدود 22 لاکھ مربع میل تک پھیلی ہوئی تھیں۔

آپ نے دو بڑی طاقتوں ایران اور روم کو شکست دی، بیت المال کا شعبہ فعال کیا، اسلامی مملکت کو صوبوں اور اضلاع میں تقسیم کیا، عشرہ خراج کا نظام نافذ کیا اور پولیس کا محکمہ قائم کیا۔27 ذی الحج 23 ہجری کو نماز فجر کی امامت کے دوران ابو لولو فیروز نامی مجوسی نے حضرت عمر فاروق رضی اللہ تعالیٰ عنہ کو خنجر سے زخمی کر دیا جس کے تین روز بعد یکم محرم الحرام 24 ہجری کو آپؓ نے جام شہادت نوش فرمایا۔آپؓ روضہ رسولؐ میں رسول اللہ صلی اللہ علیہ وسلم کے پہلو مبارک میں مدفن ہیں۔