سعودی عرب،جازان میں خواتین کے لیے اپنی نوعیت کا پہلا کارواشنگ پلانٹ

ہفتہ 28 جون 2025 09:20

جازان (اُردو پوائنٹ اخبارتازہ ترین - اے پی پی۔ 28 جون2025ء) سعودی عرب کے شہر جازان میں مقامی شہری نے خواتین کے لیے پہلا کارواشنگ پلانٹ کا آغاز کردیا۔ پلانٹ کا تمام اسٹاف خواتین پرمشتمل ہے جبکہ صارفین بھی خواتین ہی ہیں۔سبق نیوز کے مطابق جازان کے علاقے صامطہ کمشنری سے تعلق رکھنے والے مقامی شہری حسام الیامی نے بتایا کہ خواتین کےلیے مخصوص کارواشنگ پلانٹ کا خیال خانگی تقریب کے دوران آیا جس میں یہ بات سنی کہ خواتین کے لیے گاڑی دھلوانے کا مخصوص مقام ہونا چاہئے تاکہ وہ آرام سے یہ کام کراسکیں۔

انہوں نے کہا کہ تقریب سے آنے کے بعد یہ سوچ میرے ذہن میں گھر گئی تھی اس بارے میں متعدد بارسوچا اور مختلف پہلوں سے اس کا جائزہ لینے کے بعد تیاریاں شروع کردیں۔خواتین کے لیے اپنی نوعیت کے پہلے کارواشنگ پلانٹ میں اس وقت 10 خواتین کام کررہی ہیں جو دوشفٹوں میں ڈیوٹی انجام دیتی ہیں۔

(جاری ہے)

کارکن خواتین کو گاڑی دھونے اسے خشک کرنے اور آنے والی خواتین کا استقبال کرنے کی مکمل تربیت فراہم کی گئی ہے۔

الیامی نے کہا کہ منصوبے کو عملی شکل میں لانے کےلیے سرمایہ کی فراہمی کے حوالے سے حکومتی ادارے کی جانب سے بڑا تعاون حاصل رہا۔دوسری جانب خواتین کے پہلے کارواشنگ پلانٹ میں آنے والی خواتین کا کہنا تھا کہ یہ ایک مثالی اقدام ہے جس سے ہمیں بے حد آسانی ہوئی اورآرام سے ویٹنگ روم میں بیٹھ کر گاڑی کے دھلنے کے مناظر دیکھتے ہیں اور اس بات کا بھی یقین ہے کہ تمام امور بہترین طریقے سے انجام پاتے ہیں۔