۱ نوجوان لیڈرز کی تربیت اور انہیں علاقائی و عالمی چیلنجز سے آگاہ کرنا وقت کی اہم ضرورت ہے،فیصل کریم کنڈی

ہفتہ 28 جون 2025 22:05

پشاور(اُردو پوائنٹ اخبارتازہ ترین - آن لائن۔ 28 جون2025ء)گورنر خیبرپختونخوا فیصل کریم کنڈی نے کہا ہے کہ نوجوان لیڈرز کی تربیت اور انہیں علاقائی و عالمی چیلنجز سے آگاہ کرنا وقت کی اہم ضرورت ہے تاکہ وہ ملک کے روشن مستقبل کے لیے فعال کردار ادا کر سکیں۔ان خیالات کا اظہار انہوں نے ہفتہ کے روز اسلام آباد میں آرگنائزیشن آف اسلامک یوتھ کے زیر اہتمام منعقدہ SCO سیمولیشن کانفرنس کی افتتاحی تقریب سے بحیثیت مہمان خصوصی خطاب کرتے ہوئے کیا۔

کانفرنس میں صدر آرگنائزیشن آف اسلامک یوتھ حماد خان کاکڑ و دیگر شخصیات اور نوجوان لیڈرز شریک تھے۔ گورنر فیصل کریم کنڈی نے کہا کہ یہ کانفرنس نہ صرف نوجوانوں کے لیے ایک تعلیمی سرگرمی ہے بلکہ حقیقی سفارتکاری، تعاون اور قیادت کے جذبے کی عملی تربیت کا بہترین موقع بھی ہے۔

(جاری ہے)

انہوں نے کہا کہ یہ سیمولیشن ایک طاقتور پلیٹ فارم ہے جو ہمارے نوجوانوں کو تنقیدی علاقائی و عالمی امور پر تبادلہ خیال کا موقع فراہم کرتا ہے اور انہیں ایسی مہارتیں اور بصیرت سکھاتا ہے جو مستقبل میں انہیں بااعتماد اور دوراندیش رہنما بنائیں گی۔

گورنر نے کہا کہ شنگھائی تعاون تنظیم مختلف قوموں کو باہمی اعتماد اور ترقی کے جذبے کے تحت یکجا کرتی ہے اور آج کے باہم جڑے ہوئے دور میں اس کی اہمیت پہلے سے کہیں زیادہ بڑھ گئی ہے۔ انہوں نے کہا کہ علاقائی سلامتی سے لے کر ماحولیاتی تبدیلی، پائیدار ترقی اور ٹیکنالوجی تک، ایس سی او مشترکہ ذمہ داری اور اجتماعی تعاون کی علامت ہے۔گورنر نے کانفرنس کی کامیابی کے لیے نیک خواہشات کا اظہار کرتے ہوئے امید ظاہر کی کہ یہ اقدام مستقبل میں مزید نوجوانوں کو متاثر کرے گا اور انہیں بین الاقوامی معاملات میں فعال کردار ادا کرنے کی ترغیب دے گا۔#