مجھے علیمہ خان نے پی ٹی آئی سے نکلوایا وہ سمجھتی ہیں پارٹی ان کے دم پر چل رہی ہے، شیرافضل مروت

اسلام آباد ( اُردو پوائنٹ اخبارتازہ ترین۔ 02 جولائی 2025ء ) رکن قومی اسمبلی شیر افضل مروت نے الزام عائد کیا ہے کہ مجھے علیمہ خان نے پارٹی سے نکلوایا اور وہ سمجھتی ہیں کہ تحریک انصاف ان کے دم پر چل رہی ہے۔ اے آر وائی نیوز کے پروگرام میں گفتگو کرتے ہوئے انہوں نے کہا کہ اس وقت پی ٹی آئی میں یکطرفہ فیصلے ہورہے ہیں، ، پارٹی میں بعض ایسے فیصلے بھی ہوئے ہیں جو پی ٹی آئی دشمنی پر مبنی تھے، الیکشن سے قبل جب انتخابی نشان چھین لیا گیا تھا تو مولانا شیرانی کو چھوڑ کر کیوں پی ٹی آئی پی سے اتحاد کیا گیا؟ ایسے کئی فیصلوں کی مثالیں دے سکتا ہوں جو پارٹی دشمنی پر مبنی تھے۔

شیر افضل مروت کا کہنا ہے کہ علیمہ خان سمجھتی ہیں پارٹی ان کے دم پر چل رہی ہے، مجھے پارٹی سے بھی انہوں نے نکلوایا، علیمہ خان نے اب علی امین گنڈاپور کے خلاف محاذ کھولا ہوا ہے، وہ ڈیڑھ سال سے متحرک ہیں، انہوں نے پارٹی کو فتح کرلیا، کس کو پارٹی میں آنا اور جانا ہے، کس کے خلاف مہم چلانی ہے، سب فیصلے وہ کرتی ہیں، ہم ایک دوسرے کی بے توقیری کیوں کرتے ہیں؟ ہمیں ایک دوسرے کو سپیس دینی چاہیئے، سیاست کو دشمنی نہیں بنانا چاہیئے۔

(جاری ہے)

ایک سوال پر انہوں نے جواب دیا کہ عمران خان تک رسائی ہوگی تو یقیناً مشاورت درست ہوسکے گی اور ہمیں پارٹی رہنماؤں اورقیادت پراعتماد کرنا ہوگا، اس لیے پی ٹی آئی مذاکراتی کمیٹی اور دیگر رہنماؤں پر اعتماد کرنا چاہیئے، ہر چیز کیلئے اڈیالہ جانےکی ضرورت نہیں ہے، پارٹی رہنماؤں پر بھی اعتماد ہونا چاہیئے، ماضی میں جوغلطیاں ہوئی ہیں ان کا اعتراف کرنا چاہیئے، پی ٹی آئی میں فیصلہ سازی ایسی ہے جسے تبدیل کرنے کیلئے سب کو راستہ پتا ہے، عمران خان کی رائے کس طرح تبدیل کرنی ہے اکثر پارٹی کے لوگ جانتے ہیں۔

رکن قومی اسمبلی کہتے ہیں کہ اگر کوئی یہ سمجھتا ہے کہ مولانا فضل الرحمان بانی پی ٹی آئی عمران خان کیلئے سڑکوں پر نکلیں گے تو یہ کبھی نہیں ہوسکتا، مجھے تو پتا نہیں کون لوگ اس قسم کے خواب دیکھ رہے تھے حالاں کہ میں نے تو روکا تھا، اس لیے جب پی ٹی آئی والے مولانا فضل الرحمان کے گھر جاتے تھے میں نے اس وقت بھی اعتراض کیا تھا، میں نے کہا تھا مولانا فضل الرحمان بانی پی ٹی آئی عمران خان کیلئے نہیں نکلیں گے۔