کمشنر آفس راولپنڈی میں زرعی ایڈوائزری کمیٹی اور ٹاسک فورس سب کمیٹی کا اجلاس ،زرعی شعبے کو دیئے گئے حکومتی اہداف پر عملدرآمد کا جائزہ

اتوار 29 جون 2025 17:00

راولپنڈی (اُردو پوائنٹ اخبارتازہ ترین - اے پی پی۔ 29 جون2025ء) کمشنر آفس راولپنڈی میں زرعی ایڈوائزری کمیٹی اور ٹاسک فورس سب کمیٹی کا اجلاس ایڈیشنل کمشنر ریونیو مسعود بخاری کی زیر صدارت منعقد ہوا۔ اجلاس میں محکمہ زراعت، لائیو سٹاک، واٹر ریسورسز ڈویلپمنٹ، پیسٹی سائیڈز کوالٹی کنٹرول سمیت مختلف محکموں کے افسران نے شرکت کی۔ اٹک، جہلم اور چکوال کے ڈپٹی کمشنرز کے نمائندگان ویڈیو لنک کے ذریعے شریک ہوئے۔

اجلاس کا مقصد مالی سال 25-2024 کے لیے زرعی شعبے کو دیئے گئے حکومتی اہداف پر عملدرآمد کا جائزہ لینا تھا۔ ڈائریکٹر زراعت شاہد افتخار بخاری نے بریفنگ دیتے ہوئے بتایا کہ کسان کارڈ سکیم کے تحت راولپنڈی ڈویژن میں قائم 22 ڈسٹری بیوشن مراکز کے ذریعے اب تک 23,070 کسان کارڈز جاری کئے جا چکے ہیں جو 88 فیصد ہدف کی تکمیل کو ظاہر کرتے ہیں۔

(جاری ہے)

انہوں نے بتایا کہ 12 جون 2025 سے اب تک 1,943 کسان مراکز کا دورہ کر چکے ہیں۔

گرین ٹریکٹر پروگرام کے تحت اٹک، راولپنڈی، مری، جہلم، چکوال اور تلہ گنگ کے کسانوں کو اب تک 523 ٹریکٹرز فراہم کیے جا چکے ہیں۔ اجلاس میں گندم پیداوار مقابلہ اور زرعی انٹرن شپ پروگرام کے بارے میں بھی تفصیلی بریفنگ دی گئی جس میں بتایا گیا کہ انٹرنیز فیلڈ میں سرگرم کردار ادا کر رہے ہیں۔ مسعود بخاری نے کہا کہ زرعی اصلاحات کے اثرات نچلی سطح تک پہنچنے چاہئیں۔

انہوں نے متعلقہ محکموں کو ہدایت کی کہ مقررہ اہداف کے حصول کے لیے مشترکہ اور مربوط حکمت عملی اپنائی جائے اور کسانوں کو زیادہ سے زیادہ سہولیات فراہم کی جائیں۔ انہوں نے اس بات پر زور دیا کہ ایسی فصلوں کو ترجیح دی جائے جو زیادہ پیداوار دیتی ہیں تاکہ کسانوں کی آمدنی میں اضافہ ممکن ہو۔ ان فصلوں کو سبسڈی پر فراہم کرنے کی تجاویز بھی زیر غور آئیں۔

Facebook Twitter Google + Share on Whatsapp

کمشنر آفس راولپنڈی میں زرعی ایڈوائزری کمیٹی اور ٹاسک فورس سب کمیٹی کا اجلاس ،زرعی شعبے کو دیئے گئے حکومتی اہداف پر عملدرآمد کا جائزہ

متعلقہ عنوان :

مزید قومی خبریں