"ورلڈ سپورٹس سمٹ" رواں سال دسمبر میں دبئی میں منعقد ہو گی ، عالمی شخصیات کی شرکت متوقع

پیر 30 جون 2025 14:30

دبئی (اُردو پوائنٹ اخبارتازہ ترین - اے پی پی۔ 30 جون2025ء) ورلڈ سپورٹس سمٹ کا انعقاد دبئی میں 29 اور 30 دسمبر کو کیا جائے گا۔ امارات نیوز ایجنسی وام کے مطابق اس بین الاقوامی ایونٹ میں دنیا بھر سے کھیلوں سے وابستہ سرکردہ شخصیات، ماہرین، کوچز اور فیصلہ ساز شرکت کریں گے، جو کھیلوں کے شعبے کے مستقبل کی سمت طے کرنے کے لیے متحد ہوں گے۔دبئی کے ولی عہد، نائب وزیر اعظم اور وزیر دفاع، شیخ حمدان نے کہا کہ یہ عالمی اجلاس کھیلوں کے میدان سے جڑے موجودہ اور سابق اسٹارز، اعلیٰ حکام، کوچز اور ماہرین کو ایک پلیٹ فارم پر اکٹھا کرے گا تاکہ کھیل کے شعبے میں نئے مواقع تلاش کیے جا سکیں، موجودہ چیلنجز کا حل تلاش کیا جا سکے اور مستقبل کے لیے ایک جامع لائحہ عمل تشکیل دیا جا سکے۔

ان کا کہنا تھا کہ کھیل کا شعبہ نہ صرف مختلف اقوام کو ایک دوسرے کے قریب لانے اور نوجوان نسل کو متاثر کرنے میں کردار ادا کرتا ہے، بلکہ معیشت کی ترقی، ٹیلنٹ کی نشوونما اور عوامی دلچسپی کے فروغ میں بھی اہم کردار ادا کرتا ہے۔

(جاری ہے)

انہوں نے مزید کہا کہ یہ اجلاس ٹیم اور انفرادی کھیلوں دونوں کے مستقبل پر غور کرے گا، نیز قومی ٹیموں اور کھیلوں کے کلبز کی کارکردگی بہتر بنانے کے لیے پالیسی تجاویز بھی زیرِ بحث آئیں گی۔

تعلیمی اداروں اور سپورٹس اکیڈمیوں کے کردار کو بھی نمایاں کیا جائے گا تاکہ ہر عمر کے کھلاڑیوں کی تربیت کو مؤثر بنایا جا سکے۔یہ سمٹ دبئی سپورٹس کونسل کے زیرِ اہتمام مدینت جمیرہ میں منعقد ہو گا۔ اجلاس کے دوران متعدد پینل مباحثے، کلیدی خطابات، ورکشاپس اور باضابطہ ملاقاتیں شامل ہوں گی۔ دنیا بھر کی کھیلوں کی تنظیموں، ٹیموں اور فیڈریشنز کے نمائندے شرکت کریں گے، جو کھیلوں کی صنعت کے مستقبل کو اقتصادی، قانونی، ضابطہ جاتی اور سماجی زاویوں سے جانچنے اور بہتر بنانے پر تبادلہ خیال کریں گے۔

اجلاس میں شائقین کی دلچسپی بڑھانے، کھیلوں کے ایونٹس کی اقتصادی پائیداری کو بہتر بنانے، اور تیزی سے ترقی کرتی ہوئی ٹیکنالوجی، مصنوعی ذہانت اور ڈیٹا اینالیٹکس کے اثرات پر بھی گفتگو کی جائے گی۔