خیبرپختونخوا،سرکاری گاڑیوں کے ذاتی اور غیر سرکاری استعمال کا انکشاف

یہ گاڑیاں صدر، وزیراعظم یا کسی اعلیٰ شخصیت کے سرکاری دوروں کیلئے استعمال نہیں ہوئیں ،رپورٹ

جمعہ 4 جولائی 2025 13:04

خیبرپختونخوا،سرکاری گاڑیوں کے ذاتی اور غیر سرکاری استعمال کا انکشاف

پشاور(اُردو پوائنٹ اخبارتازہ ترین - این این آئی۔ 04 جولائی2025ء)خیبرپختونخوا کے سرکاری افسران کی جانب سے سرکاری گاڑیوں کے ذاتی اور غیر سرکاری استعمال کا انکشاف ہوا ہے۔آڈیٹر جنرل کی رپورٹ کے مطابق خیبرپختونخوا میں سرکاری گاڑیاں نہ صرف ذاتی مقاصد بلکہ شادی بیاہ جیسی تقریبات میں بھی استعمال کی گئیں۔ رپورٹ نے اس عمل کو قانون کے صریحاً خلاف قرار دیا ہے۔

(جاری ہے)

رپورٹ کے مطابق نگران حکومت کے دوران مالی سال 24-2023 میں محکمہ انتظامیہ کی 70 سرکاری گاڑیوں کے بے دریغ استعمال پر سخت اعتراض کیا گیا ہے، ان گاڑیوں کیلئے ایک کروڑ 23 لاکھ 35 ہزار روپے کا فیول صرف ذاتی استعمال پر خرچ کیا گیا۔رپورٹ میں انکشاف کیا گیاہے کہ یہ گاڑیاں صدر، وزیراعظم یا کسی اعلیٰ شخصیت کے سرکاری دوروں کیلئے بھی استعمال نہیں ہوئیں جس سے ثابت ہوتا ہے کہ مکمل اخراجات ذاتی استعمال کی نذر ہوئے۔