شہادت امام حسین کا فلسفہ ظلم و جبر کیخلاف ہر قیمت پر ڈٹ جانا ہے،پی سی ایم ای اے

ہفتہ 5 جولائی 2025 13:32

اسلام آباد (اُردو پوائنٹ اخبارتازہ ترین - اے پی پی۔ 05 جولائی2025ء) پاکستان کارپٹ مینو فیکچررز اینڈ ایکسپورٹرز ایسوسی ایشن (پی سی ایم ای اے)کے پیٹرن انچیف عبد اللطیف ملک، چیئرمین میاں عتیق الرحمان اور وائس چیئرمین ریاض احمد نے یوم عاشور کے حوالہ سے ہفتہ کو اپنے پیغام میں کہا ہے کہ یومِ عاشور عظیم تر مقصد کے لیے کسی بھی قربانی سے دریغ نہ کرنے کا درس دیتا ہے۔

شہادت امام حسین علیہ السلام کا فلسفہ ظلم و جبر کے خلاف ہر قیمت پر ڈٹ جانا ہے۔انہوں نے کہا کہ حضرت امام حسین علیہ السلام نے طاقت اور تعداد کم ہونے کے باوجود اسلام کے اصولوں اور اقدار سے دستبردار ہونے سے انکار کیا۔ انہوں نے اسلام کی حقیقی تعلیمات کے تحفظ کے لیے اپنے خاندان اور ساتھیوں سمیت اپنی جان قربان کر دی ۔

(جاری ہے)

انہوں نے کہا کہ یہ ایک یاد دہانی ہے کہ ہمیں معاشرے کی عظیم تر بھلائی اور انسانیت کی بہتری کے لیے ذاتی آسائشوں اور خواہشات کو ترک کر دینا چاہیے۔

آج حضرت امام حسین علیہ السلام کا پیغام پوری دنیا کے مسلمانوں میں گونج رہا ہے۔پی سی ایم ای اے کے عہدیداروں نے کہا کہ یوم عاشور کے دن کے پیغام کو دیکھا جائے تو اس میں مسلمانوں کے لئے مقصد حیات پوشیدہ ہے ، اس دن میں ایسے رازہیں جنہیں پانے کیلئے ہمیں امام حسین رضی اللہ تعالی عنہ کی عملی زندگی کا جائزہ لینا ہوگا اور اپنے لئے مشعل راہ بنانا ہوگا۔