برائن لارا عظیم کھلاڑی، لیجنڈز کا ریکارڈ انہی کے پاس رہنا چاہیئے، ملڈر نے لارا کا ریکارڈ نہ توڑنے کی وجہ بتادی

ویان ملڈر نے زمبابوے کے خلاف شاندار ٹرپل سنچری سکور کی اور 367 رنز بنا کر اننگ ڈیکلیئر کردی

ذیشان مہتاب منگل 8 جولائی 2025 10:24

برائن لارا عظیم کھلاڑی، لیجنڈز کا ریکارڈ انہی کے پاس رہنا چاہیئے، ملڈر ..

بلاوایو (اردو پوائنٹ تازہ ترین اخبار ۔ 8 جولائی 2025ء ) جنوبی افریقا کےکپتان ویان ملڈر نے برائن لارا کا ٹیسٹ کرکٹ کی ایک اننگ میں 400 رنز کا ریکارڈ نہ توڑنے کی وجہ بتادی۔

خیال رہے کہ بلاوایو ٹیسٹ میں جنوبی افریقا کے کپتان ویان ملڈر نے زمبابوے کے خلاف شاندار ٹرپل سنچری اسکور کی اور 367 رنز بنا کر اننگ ڈکلیئر کردی۔ ملڈر نے صرف 334 گیندوں پر 367 رنز کی اننگ کھیلی جس میں 49 چوکے اور 4 چھکے شامل تھے۔

جنوبی افریقی کپتان نے ٹیسٹ میچ کے دوسرے دن جب اننگ ڈکلیئر کی تو جنوبی افریقا نے 5 وکٹوں کے نقصان پر 626 رنز بنائے تھے۔

ملڈر نے ٹرپل سنچری مکمل کی تو وہ ہاشم آملہ کے بعد یہ سنگ میل عبور کرنے والے دوسرے افریقی بیٹر بن گئے۔

350 رنز کے بعد ایسا لگ رہا تھا کہ ملڈر باآسانی برائن لارا کا 400 رنز کا ریکارڈ توڑ دیں گے۔

(جاری ہے)

تاہم جب وہ لارا کا ریکارڈ توڑنے سے صرف 34 رنز دور تھے تو انہوں نے اننگ ڈکلیئر کرکے شائقین کرکٹ کو ورطہ حیرت میں ڈال دیا۔

دوسرے دن کے کھیل کے اختتام کے بعد سابق جنوبی افریقی کپتان اور کمنٹیٹر شان پولاک سے گفتگو میں ویان ملڈر نے بتایا کہ انہوں نے برائن لارا کا ریکارڈ اس لیے نہیں توڑا کیونکہ وہ لیجنڈ کرکٹر ہیں، انہوں نے انگلینڈ کے خلاف 400 رنز بنائے تھے، میں چاہتا تھا کہ ریکارڈ لارا کے پاس ہی رہے، دوبارہ موقع ملا تب بھی ایسا ہی کروں گا۔

27 سالہ جنوبی افریقی کپتان ویان ملڈر کا کہنا تھا کہ سب سے پہلے میں نے یہ سوچا کہ رنز بہت ہوچکے ہیں، میرے لیے یہ بہت خاص اننگ تھی، اچھی بات یہ ہے کہ میری اننگ ٹیم کے کام آئی، میں نے اپنے کوچ سے بات کی اور کہا کہ ریکارڈ لیجنڈز کے پاس ہی ہونا چاہیے، برائن لارا نے جو ریکارڈ قائم کیا ہے وہ ویسے ہی رہنا چاہیے۔

"Let the legends keep the really big scores." ❤️

🇿🇦 Wiaan Mulder speaks to Shaun Pollock after his historic knock 👏#ZIMvSA | #SSCricket pic.twitter.com/VqySlzOzHY
— SuperSport 🏆 (@SuperSportTV) July 7, 2025