راولپنڈی میں 86 بوسیدہ و خستہ حال عمارتوں کی نشاندہی، مکینوں کو 15 دن میں خالی کرنے کا نوٹس جاری

منگل 8 جولائی 2025 22:20

راولپنڈی (اُردو پوائنٹ اخبارتازہ ترین - اے پی پی۔ 08 جولائی2025ء) میونسپل کارپوریشن راولپنڈی کی جانب سے شہری سلامتی اور عوامی تحفظ کو مدنظر رکھتے ہوئے بوسیدہ و خستہ حال عمارتوں کا سروے کرتے ہوئے 86 عمارتوں کی نشاندہی کی گئی ہے۔ موسمی حالات، متوقع بارشوں، ممکنہ سیلاب اور زلزلہ جیسے خطرات کے پیش نظر پنجاب لوکل گورنمنٹ ایکٹ 2022 کے تحت راولپنڈی شہر میں نشان کردہ 86 خستہ حال اور بوسیدہ عمارتوں کو نوٹسز جاری کیے گئے ہیں۔

میونسپل کارپوریشن نے ان عمارتوں کے مالکان و مکینوں کو نوٹس جاری کرتے ہوئے ہدایت کی ہے کہ وہ آئندہ 15 دن کے اندر اندر ان عمارتوں کو خالی کریں اور انکی تعمیر نو کریں یا انہیں مسمار کریں۔ میونسپل کارپوریشن راولپنڈی ان اقدامات میں مکمل تکنیکی اور انتظامی تعاون فراہم کرے گی تاکہ کسی بھی ممکنہ جانی یا مالی نقصان سے بچا جا سکے۔

(جاری ہے)

چیف آفیسر عمران علی نے کہا کہ شہریوں کی جان و مال کا تحفظ ہماری اولین ترجیح ہے، اس لیے کسی قسم کی غفلت یا تاخیر برداشت نہیں کی جائے گی۔

مزید برآں، نالہ لئی اور دیگر نالہ جات کے کناروں پر قائم تجاوزات کے مالکان کو بھی متنبہ کیا گیا ہے کہ وہ فوری طور پر اپنی تجاوزات ختم کریں اور محفوظ مقامات پر منتقل ہو جائیں۔ بصورت دیگر قانونی کارروائی عمل میں لائی جائے گی اور تجاوزات کو زبردستی ہٹا دیا جائے گا۔ انتظامیہ نے عوام سے اپیل کی ہے کہ وہ اپنے اور دوسروں کے تحفظ کے لیے ان ہدایات پر فوری عملدرآمد کریں اور کسی بھی قسم کی معلومات یا شکایات کے لیے میونسپل کارپوریشن راولپنڈی سے رجوع کریں۔