خواجہ سلمان رفیق کا نوازشریف کارڈیالوجی انسٹی ٹیوٹ سرگودھا کا دورہ، کام کا جائزہ

بدھ 9 جولائی 2025 22:29

لاہور (اُردو پوائنٹ اخبارتازہ ترین - آن لائن۔ 09 جولائی2025ء) صوبائی وزیر صحت خواجہ سلمان رفیق نے سرگودھا میں زیر تعمیر نواز شریف انسٹی ٹیوٹ آف کارڈیالوجی کا دورہ کیا اور جاری تعمیراتی کام، طبی سہولیات اور انتظامات کا جائزہ لیا۔ ان کے ہمراہ سیکرٹری سپیشلائزڈ ہیلتھ کیئر اینڈ میڈیکل ایجوکیشن عظمت محمود خان، چیئرمین ایڈوائزری کمیٹی ڈاکٹر فرقد عالمگیر، سپیشل سیکرٹری طارق محمود رحمانی، کمشنر جہانزیب اعوان، پرنسپل پروفیسر وارث فاروقہ و دیگر اعلیٰ افسران موجود تھے۔

وزیر صحت نے حال ہی میں مکمل ہونے والی او پی ڈی، ای سی جی، ایکو کارڈیوگرافی، ہولٹر مانیٹرنگ، لیبارٹری اور دیگر طبی شعبہ جات کا معائنہ کیا۔ انہوں نے مریضوں سے ملاقات کر کے فراہم کی گئی سہولیات سے متعلق براہ راست رائے بھی لی۔

(جاری ہے)

خواجہ سلمان رفیق نے کہا کہ وزیراعلیٰ پنجاب مریم نواز کے وژن کے مطابق عوام کو جدید طبی سہولیات فراہم کی جا رہی ہیں۔

انہوں نے یقین دلایا کہ کسی بھی سطح پر معیار پر سمجھوتہ نہیں کیا جائے گا۔آئی ڈیپ ٹیم نے بریفنگ میں بتایا کہ ہسپتال کی ان ڈور عمارت کا 80 فیصد کام مکمل ہو چکا ہے اور تمام جدید مشینری کی تنصیب جاری ہے۔ ہسپتال دسمبر 2025 تک مکمل فعال ہو جائے گا۔بعد ازاں کمیٹی روم میں اعلیٰ سطحی اجلاس بھی منعقد ہوا جس میں منصوبے کی موجودہ صورتحال، مستقبل کے مراحل اور اسپتال میں مریضوں کے داخلے سے لے کر علاج تک کے تمام مراحل کا تفصیلی جائزہ لیا گیا۔

سیکرٹری صحت عظمت محمود خان نے کہا کہ انسٹی ٹیوٹ کی پیش رفت تسلی بخش ہے اور تمام منصوبے سخت مانیٹرنگ کے تحت مکمل کیے جا رہے ہیں۔ڈاکٹر فرقد عالمگیر نے کہا کہ مریم نواز شریف کو امراض قلب کی سہولیات فراہم کرنے پر خراج تحسین پیش کرتے ہیں، اب لاکھوں افراد کو علاج کے لیے لاہور یا اسلام آباد جانے کی ضرورت نہیں رہے گی۔سپیشل سیکرٹری طارق محمود رحمانی نے بتایا کہ ہسپتال کے لیے ایچ آر کی تیاری تیز رفتاری سے مکمل کی جا رہی ہے اور مریضوں کو اعلیٰ ترین سہولیات فراہم کرنا حکومت کی اولین ترجیح ہے۔