شعیب ملک کو بیٹے اذہان کے ساتھ دبئی میں ملاقات پر تنقید کا سامنا

شعیب ملک نے سابق بھارتی ٹینس سٹار ثانیہ مرزا سے 2010ء میں شادی کی تھی، شادی کے 8 سال بعد 30 اکتوبر 2018ء کو ان کے ہاں بیٹے کی پیدائش ہوئی

ذیشان مہتاب جمعرات 10 جولائی 2025 12:45

شعیب ملک کو بیٹے اذہان کے ساتھ دبئی میں ملاقات پر تنقید کا سامنا

لاہور،دبئی (اردو پوائنٹ تازہ ترین اخبار ۔ 10 جولائی 2025ء ) کرکٹر شعیب ملک نے دبئی میں اپنے بیٹے اذہان سے ملاقات کی اور اس لمحے کی تصویر سوشل میڈیا پر شیئر کی، تاہم اس ملاقات پر مداحوں کی جانب سے تنقید کا سلسلہ جاری ہے۔

ڈان نیوزکے مطابق حال ہی میں شعیب ملک نے انسٹاگرام پر اپنے بیٹے اذہان ملک کے ساتھ ملاقات کی تصویر شیئر کی۔

انہوں نے تصویر کے ساتھ کیپشن میں لکھا کہ ’اپنے بہترین دوست کے ساتھ لنچ‘۔

کرکٹر کی اس پوسٹ پر سوشل میڈیا صارفین کی جانب سے تنقید کی جارہی ہے۔

صارفین کے مطابق والدین کی طلاق کے بعد سب سے زیادہ بچے متاثر ہوتے ہیں، اسی لیے والدین کو چاہیے کہ شادی کے کم از کم پانچ سال تک بچے پیدا نہ کریں بلکہ پہلے ایک دوسرے کو اچھی طرح سے سمجھیں۔

(جاری ہے)

کچھ صارفین کا خیال ہے کہ سال میں دو مرتبہ بچے کو لنچ پر لے جانے سے دوستی نہیں بنتی، بلکہ فاصلے مزید بڑھ جاتے ہیں۔

ایک صارف نے یہ بھی لکھا کہ کرکٹر کو باپ ہونے کی ذمے داری نبھانی چاہیے کیونکہ یہ صرف ماں کی ذمے داری نہیں ہوتی۔

یاد رہے کہ شعیب ملک نے سابق بھارتی ٹینس اسٹار ثانیہ مرزا سے 2010ء میں شادی کی تھی۔ شادی کے 8 سال بعد 30 اکتوبر 2018ء کو ان کے ہاں پہلے بیٹے کی پیدائش ہوئی، تاہم ان کی شادی جنوری 2024ء میں باضابطہ طور پر ختم ہو گئی۔ بعد ازاں شعیب ملک نے جنوری 2024ء میں اداکارہ ثنا جاوید سے دوسری شادی کر لی۔