حسن نواز نے وہ کارنامہ 2 مرتبہ کردکھایا جو شاہد آفریدی ایک مرتبہ بھی نہ کرسکے

22 سالہ بیٹر نے یو اے ای کیخلاف صرف 26 گیندوں پر 2 چوکوں اور 6 چھکوں کی مدد سے 56 رنز کی شاندار باری کھیلی

ذیشان مہتاب اتوار 31 اگست 2025 18:25

حسن نواز نے وہ کارنامہ 2 مرتبہ کردکھایا جو شاہد آفریدی ایک مرتبہ بھی ..

شارجہ (اردو پوائنٹ تازہ ترین اخبار ۔ 31 اگست 2025ء ) قومی ٹیم کے ابھرتے ہوئے مڈل آرڈر بیٹر حسن نواز نے ٹی ٹونٹی کرکٹ میں وہ کارنامہ 2 مرتبہ کردکھایا جو شاہد آفریدی ایک مرتبہ بھی نہیں کرسکے تھے۔

22 سالہ حسن نواز نے تین ملکی ٹی ٹونٹی سیریز کے دوسرے مقابلے میں متحدہ عرب امارات کیخلاف شاندار بیٹنگ کا مظاہرہ کرتے ہوئے صرف 26 گیندوں پر 2 چوکوں اور 6 چھکوں کی مدد سے 56 رنز کی شاندار باری کھیل ڈالی، ان کی اس اننگز نے پاکستان کو پہلی بار یو اے ای میں 200 رنز کرنے میں مدد دی اور گرین شرٹس نے میزبان ٹیم کو جیت کے لیے 208 رنز کا ہدف دیا۔

حسن نواز کے کیریئر میں یہ دوسرا موقع تھا جب انہوں نے 200 کے سٹرائیک ریٹ سے نصف سنچری سکور کی، ان کے علاوہ شعیب ملک اور عمر اکمل بھی 2،2 مرتبہ یہ کارنامہ سر انجام دے چکے ہیں، فخر زمان نے ایک مرتبہ یہ کارنامہ سرانجام دے رکھا ہے۔

(جاری ہے)

واضح رہے کہ سہ ملکی کرکٹ سیریز کے دوسرے میچ میں پاکستان نے متحدہ عرب امارات (یو اے ای) کو شکست دے کر ایونٹ کی مسلسل دوسری فتح اپنے نام کرلی۔

شارجہ کے اسٹیڈیم میں کھیلے گئے میچ میں پاکستان نے ٹاس جیت کر پہلے بیٹنگ کی اور مقررہ 20 اوورز میں 207 رنز بنائے اور 208 رنز کا ہدف دیا تھا، صائم ایوب نے جارحانہ انداز سے بیٹنگ کرتے ہوئے 38 گیندوں پر 69 رنز کی شاندار اننگز کھیلی اور نمایاں بلے باز رہے جبکہ حسن نواز نے 26 گیندوں پر 56 رنز بنائے، قومی ٹیم کے 6 کھلاڑی ڈبل فیگر میں بھی داخل نہ ہوسکے جبکہ یو اے ای کے جنید صدیقی اور صغیر خان تین تین وکٹیں لے کر سر فہرست رہے، حیدر علی نے دو وکٹیں لیں۔

ہدف کے تعاقب میں یو اے ای کی ٹیم مقرر 20 اوورز میں 8 وکٹوں کے نقصان پر 176 رنز بنا سکی، یوں پاکستان نے 31 رنز سے فتح اپنے نام کی، حسن علی نے تین جبکہ محمد نواز نے دو اور سلمان مرزا ، صائم ایوب نے ایک ایک وکٹ حاصل کی، یو اے ای کی جانب سے آصف خان 77 رنز بناکر نمایاں بلے باز رہے۔